Стала вядома, што за вытворца аўтамабіляў будзе займацца вырабам беспілотнікаў ва Украіне. Гэта буйная аўтамабільная кампанія «Renault».
Журналісты «Franceinfo» звярнуліся да прадстаўнікоў «Renault» з пытаннем наконт магчымага ўдзелу кампаніі ў вытворчасці беспілотнікаў ва Украіне.
Паводле інфармацыі выдання, менавіта гэты французскі аўтамабільны гігант павінен пачаць выпуск БПЛА ў партнёрстве з французскай кампаніяй, якая спецыялізуецца на абароне.
Вытворчыя магутнасці будуць размешчаны ў непасрэднай блізкасці ад зоны баявых дзеянняў – у некалькіх дзясятках або сотнях кіламетраў ад фронту.
У адказ на запыт «Franceinfo» прадстаўнікі «Renault» пацвердзілі факт кантакту з урадам, але адзначылі, што канчатковае рашэнне пакуль не прынята.
Гэтае патэнцыйнае супрацоўніцтва можа стаць важным момантам у ваенным пераўзбраенні Еўропы. Больш чым праз тры гады пасля пачатку вайны ва Украіне гэтае партнёрства сімвалізуе рост інвестыцый у абаронны сектар і павышаную ўвагу да вытворчасці ваеннай тэхнікі, адзначае «Franceinfo».
Нагадаем, што 7 чэрвеня міністр абароны Францыі Сэбаст’ен Лекарню заявіў, што французскія аўтамабільныя і абаронныя кампаніі аб’яднаюцца, каб наладзіць вытворчасць беспілотнікаў ва Украіне. Узамен Кіеў падзеліцца з Парыжам сваім вопытам выкарыстання дронаў у шырокамаштабнай вайне.
Раман Шавель belsat.eu
