Прэзідэнт Украіны Уладзімір Зяленскі паведаміў, што ЗША перанакіравалі 20 тысяч ракетаў супрацьпаветранай абароны, якія раней абяцалі Украіне, на Блізкі Усход.
У інтэрв’ю «ABC News» Уладзімір Зяленскі адзначыў, што з папярэднім прэзідэнтам ЗША Джо Байдэнам была ўзгодненая перадача Украіне 20 тысяч ракетаў для барацьбы з дронамі тыпу «Shahed».
,,«Мы разлічвалі на гэты праект, разлічвалі на гэтыя дваццаць тысяч ракетаў. Сёння раніцай [станам на 7 чэрвеня. – Заўв. «Белсату»] міністр абароны Украіны паведаміў мне, што Злучаныя Штаты перакінулі іх на Блізкі Усход», – заявіў прэзідэнт Украіны.
Таксама Зяленскі пацвердзіў, што спыненне вайсковай дапамогі з боку ЗША павялічыць шанцы Расеі на перамогу. Ён таксама падкрэсліў, што без падтрымання Вашынгтону Украіна панясе значна большыя страты.
Згодна з паведамленнем выдання «The Wall Street Journal» ад 4 чэрвеня, Злучаныя Штаты накіравалі войскам на Блізкім Усходзе кампаненты ракетаў для супрацьпаветранай абароны, якія павінна была атрымаць Украіна.
Раман Шавель belsat.eu
