Брытанская паліцыя не праводзіць расследавання ў сувязі са знікненнем спікеркі беларускай Каардынацыйнай рады Анжалікі Мельнікавай, якая магла пакінуць Польшчу, накіраваўшыся ў Вялікую Брытанію.
Пра гэта BBC паведамілі ў прэс-службе лонданскай паліцыі.
У сваю чаргу, радыё «Свабода» пагаварыла з калегамі Анжалікі Мельнікавай, якія размаўлялі з ёю незадоўга да афіцыйнай заявы пра ейнае знікненне. Паводле іх, палітык збірала пашпартныя звесткі, адрасы, нумары банкаўскіх рахункаў для складання кантрактаў аб супрацы з Каардынацыйнай радай. Было гэта тады, калі тэлефон Мельнікавай нібыта ўжо фіксавалі ў Беларусі.
,,«Мы размаўлялі аб працы. Размова была самая звычайная, яна была спакойная, жартавала. Абсалютна нічога не сведчыла, што нешта здарылася», – расказаў адзін з чальцоў Каардынацыйнай рады.
Пра знікненне спікеркі Каардынацыйнае рады сталася вядома ўвечары 28 сакавіка. Сувязі з ёй няма з 25 сакавіка. Кіраўнік НАУ Латушка 29 сакавіка расказаў, што былы муж Мельнікавай выехаў у Беларусь, а 31 сакавіка паведаміў, што мабільны тэлефон Анжалікі з 19 сакавіка фіксуецца на тэрыторыі Беларусі.
7 красавіка былы муж Мельнікавай пацвердзіў, што іхныя дочкі, сямі і трынаццаці гадоў, сапраўды цяпер разам з ім на тэрыторыі Беларусі. Пры гэтым ён адзначыў, што з былой жонкаю кантактаваў «даўно ўжо» і не мае «ўяўлення, куды яна магла знікнуць». Маці Мельнікавай таксама не ведае, дзе ейная дачка.
Кіраўнік Народнага антыкрызіснага ўпраўлення Павел Латушка 7 красавіка атрымаў адказ на дасланы раней запыт, згодна з якім папярэдняе вядзенне справы пра знікненне Мельнікавай ажыццяўляе аддзел барацьбы з крымінальным тэрорам і забойствамі Камендатуры сталічнай паліцыі Варшавы. Праваахоўныя органы Польшчы не даюць дадатковых дэталяў пра хаду расследавання.
,,«Паводле інфармацыі, што мы маем ад польскіх праваахоўнікаў, яна выязджала з дзецьмі з тэрыторыі Польшчы ў Вялікую Брытанію 26 лютага. Дзе яны цяпер – нам не вядома», – сказалі «Белсату» ў НАУ.
Няма на гэты момант дадатковай інфармацыі пра месца перабывання Мельнікавай і ў прадстаўніцы «Кіберпартызанаў» Юльяны Шаметавец, фонд дапамогі якім узначальвала зніклая спікерка КР, і ў сузаснавальніка фондаў «BY_help» і «BYSOL» Аляксея Лявончыка, які падаваў заяву пра знікненне палітычнай дзяячкі ў паліцыю Вялікай Брытаніі.
Дырэктар цэнтру «Еўрапейскі дыялог» Анатоль Лябедзька мяркуе, што шанцы на тое, што спікерка Каардынацыйнае рады цяпер у бяспецы, вельмі малыя. Ён адзначыў, што трэба разумець: мы цяпер «у стане вайны», а Мельнікава не нейкі «шараговы ваяка». Лябедзька назваў яе «палітычным генералам» і зазначыў, што гэта дае рэжыму перавагі. Галоўным падазраваным у знікненні спікеркі КР называе ўлады Беларусі і юрыст, дэлегат Каардынацыйнай рады Міхаіл Кірылюк.
У сувязі са знікненнем Мельнікавай праваахоўныя органы Польшчы запыталі дадатковыя звесткі, каб ацаніць патэнцыйныя рызыкі і пагрозы ў дачыненні Латушкі. Раней у даркнэце была змешчаная абвестка пра тое, колькі каштуе жыццё палітыка. Як расказваў Латушка, «пагрозы, якія налічваюцца дзясяткамі, ажыццяўляюцца рознымі спосабамі публічнага і непублічнага характару».
Якуб Хруст belsat.eu
