Кіраўнік Народнага антыкрызіснага ўпраўлення Павел Латушка паведаміў пра знікненне спікеркі Каардынацыйнай рады Анжалікі Мельнікавай, што належыць да ягонага палітычнага блоку.
Паводле Паўла Латушкі, сувязь з Анжалікай Мельнікавай адсутнічае з 25 сакавіка. Паводле наяўнай інфармацыі, яна цяпер не на тэрыторыі Польшчы. Ён паведаміў, што падаў заяву ў праваахоўныя органы Польшчы пра знікненне спікеркі КР.
«Мы спадзяёмся на лепшае, але разумеем, што першыя асобы дэмакратычных сілаў Беларусі – прыярытэтныя цэлі спецслужбаў рэжымаў у Беларусі і Расеі», – заявіў палітык.
Анжаліка Мельнікава ўзначаліла Каардынацыйную раду ўлетку 2024 года. Яна нарадзілася ў Нясвіжы, скончыла Менскі дзяржаўны лінгвістычны ўніверсітэт і Беларускі дзяржаўны эканамічны ўніверсітэт. Да 2018-га была намесніцаю генеральнага дырэктара «Кока-Кола Бэўрыджыз Беларусь», пасля сышла ў дэкрэтны адпачынак. У 2020-м была вымушаная пакінуць краіну праз ціск на сям’ю. Далучылася да Народнага антыкрызіснага ўпраўлення.
«BYPOL» са спасылкаю на сваю крыніцу паведаміў на гэтым тыдні, што сілавыя структуры Беларусі стварылі «асаблівыя групы» дыверсантаў, якія складаюцца з працаўнікоў КДБ, для супрацьстаяння беларускім дэмакратычным сілам. У іхныя абавязкі ўваходзіць назіранне за дзейнасцю дзяржаўных установаў Еўразвязу, прыватных карпарацыяў і міжнародных фондаў, што фінансуюць дэмакратычныя сілы, а таксама магчымае правядзенне «спецаперацыяў», у тым ліку выкрадання і ліквідацыі ўплывовых апазіцыянераў.
Якуб Хруст belsat.eu
