Навукоўцы спачатку прагназавалі невялікую геамагнітную буру, але тая аказалася моцнаю.
29 траўня 2025 года Зямлю накрыла моцная геамагнітная бура класу G3, паведаміў Цэнтр прагназавання касмічнага надвор'я NOAA. Гэта сур’ёзная касмічная з’ява, якая ўзнікае, калі магнітнае поле Зямлі сутыкаецца з магутным патокам зараджаных часціцаў ад Сонца (напрыклад, з каранальным выкідам масы – CME).
Такія буры могуць выклікаць перабоі ў працы спадарожнікаў, GPS-навігацыі, радыёсувязі і энергетычных сістэмаў. Таксама магчымае з’яўленне палярнага ззяння нават у тых рэгіёнах, дзе яно звычайна не назіраецца. Акрамя таго, некаторыя людзі могуць адчуваць галаўны боль, стомленасць, павышаны ціск – асабліва тыя, хто адчувальны да зменаў надвор’я (метэазалежны).
Паводле апошніх прагнозаў NOAA, гэтая магнітная бура паступова саслабне да канца дня. 30 траўня чакаецца вяртанне геамагнітнай актыўнасці да звычайнага ўзроўню.
Паводле трохдзённага прагнозу NOAA, на 29 траўня прагназавалася геамагнітная бура ўзроўню G1 (слабая), а на 30 траўня – геамагнітная актыўнасць ніжэй за ўзровень G1.
Тэса Анэйда belsat.eu
