Сузаснавальнік фондаў BYhelp і BYSOL Аляксей Лявончык падаў заяву аб знікненні спікеркі Каардынацыйнай рады Анжалікі Мельнікавай у паліцыю Вялікай Брытаніі. «Белсат» даведаўся падрабязнасці.
Аляксей Лявончык склаў заявы аб знікненні Анжалікі Мельнікавай у дзе структуры: паліцыю Лондана (Metropolitan Police) і ў Нацыянальнае агенцтва па расследаванні злачынстваў (NCA), якая працуе на ўсёй тэрыторыі краіны.
,,«Я вырашыў вызначыць, ці Анжаліка сапраўды прызямлялася ў Вялікай Брытаніі. Бо мне падаецца вельмі дзіўным, што чалавек, які вылецеў з Польшчы ў іншую краіну, падарожжы паміж якімі дастаткова добра адсочваюцца, проста знік. Паглядзім, што з гэтага выйдзе», – кажа Лявончык «Белсату».
Калі бліжэйшым часам не будзе вынікаў, то ён плануе прыцягнуць да справы прэсу.
«Гэта стартавы пункт. Далей усё будзе залежаць ад таго, ці будзе жаданне ў адпаведных органах гэта расследаваць. І ці будзе жаданне з майго боку на гэта ціснуць. З майго боку жаданне будзе», – працягвае Лявончык.
4 красавіка ён плануе паехаць у аэрапорты Лутан і Хітроу.
«Трэба яшчэ там скласці заявы, бо гэта два аэрапорты, куды з варшаўскага цэнтральнага аэрапорту могуць прыляцець самалёты. Не думаю, што яна ехала ў Модлін [аэрапорт па-за Варшавай. – Заўв. рэд.], каб на Ryanair ляцець у Станстэд», – дзеліцца планамі Лявончык.
Ён адзначае, што ўзяўся за справу, бо ў Польшчы ў джяржаўных структурах пра Анжаліку Мельнікаву спрабуюць даведацца і журналісты, і паплечнікі, а ў Вялікай Брытаніі дыяспара беларусаў невялікая.
«У мяне ёсць грамадзянства і Вялікай Брытаніі, і Польшчы, то бок я звяртаўся ў паліцыю як доўгатэрміновы рэзідэнт Вялікай Брытаніі. Мне падаецца, што тут асноўны акцэнт павінен рабіцца на справе аб знікненні чалавека. Магчыма, яны скажуць, што гэтая інфармацыя з’яўляецца таямніцай следства, калі гэтае следства ёсць. Магчыма, яны змогуць даць нам нейкую інфармацыю», – працягвае Лявончык.
Інфармацыя пра чалавека, які знік, сапраўды можа быць недасяжная, але суразмоўца разлічвае, што дзяржстуктуры будуць паведамляць больш, улічваючы тое, што Анжаліка Мельнікава – вядомая асоба і палітык, які можа быць у небяспецы праз дзеянні рэжыма ў Менску.
,,«Натуральна, калі гэта прыватная справа, то яе датычаць усе захады абароны інфармацыі. Натуральна, што ні польская пракуратура, ні паліцыя не могуць дзяліцца інфармацый па-за межамі сваіх кампетэнцыяў – таямніца следства. Яны могуць падзяліцца толькі са сваякамі.
Але, мне падаецца, што тут справа грамадскага інтарэсу. Анжаліка не з’яўляецца прыватнай асобай, гэта постаць беларускай апазіцыі, якая, мяркуючы па публікацыях, мела сувязь і з Кіберпартызанамі, і з іншымі асобамі, што дае мне магчымасць думаць, што, калі такі чалавек знік, то не проста так», – падкрэслівае Лявончык.
Ён дадае, што для яго гісторыя выглядае падобнай да знікнення палітыкаў у Беларусі ў 90-я і 2000-я.
«Тады ў нас было дастаткова мала магчымасцяў расследаваць гэта. Цяпер паўсюль камеры. Мне падаецца, што гэтую справу нельга закідваць. Гэта будзе азначаць, што ў нас ёсць яшчэ адзін зніклы чалавек.
Пра гэта могуць забыцца праз некалькі тыдняў і ўсё будзе спісана на тое, што Анжаліка вырашыла скрасці 100 тысяч еўра, што для Лондана не з’яўляюцца нейкай істотнай сумай. Усе гэтыя тэорыі, у тым ліку, што яна з’яўляецца агенткай, абсалютна не адпавядаюць яе профілю», – кажа Лявончык.
Ён упэўнены, што яе знікненне прымусовае, а, калі б яна была агенткай беларускіх спецслужбаў, то Мельнікаву даўно б паказалі на дзяржаўным тэлебачанні.
«Мы маем справу з двума варыянтамі – прымусовы выезд ці забойства», – падводзіць рысу Аляксей Лявончык.
Пра знікненне спікеркі Каардынацыйнай рады Анжалікі Мельнікавай ейныя сябры паведамілі ўвечары 28 сакавіка. З ёю няма сувязі з 25 сакавіка.
Арсен Рудэнка belsat.eu
