У Народным антыкрызісным упраўленні расказалі пра дадатковае правяранне пагрозаў, што паступаюць на адрас кіраўніка НАУ і намесніка кіраўніцы Аб’яднанага пераходнага кабінету Паўла Латушкі. Гэта сталася адказам на знікненне спікеркі Каардынацыйнай рады Анжалікі Мельнікавай.
«У сувязі з знікненнем Анжалікі Мельнікавай праваахоўныя органы Польшчы запрасілі дадатковыя звесткі, каб ацаніць патэнцыйныя рызыкі і пагрозы ў дачыненні Паўла Латушкі», – паведамілі ў прэс-службе НАУ ў адказ на запыт карэспандэнта «Белсату».
Нагадаем, што Павел Латушка і каманда НАУ заяўлялі, што перыядычна атрымліваюць пагрозы расправаю. У даркнэце нават была змешчаная абвестка наконт таго, колькі каштуе жыццё палітыка. Праз гэтыя пагрозы пракуратура ў Польшчы распачала расследаванне злачынства паводле артыкулаў аб падбухторванні, забойстве і дзейнасці замежных спецслужбаў.
,,«Гэтыя пагрозы, якія налічваюцца дзясяткамі, ажыццяўляюцца рознымі спосабамі публічнага і непублічнага характару. Пагрозы здзяйсняюцца не толькі ў Польшчы, але і на тэрыторыях іншых краінаў – сябраў ЕЗ. Варта адзначыць, што з верасня гэтага года колькасць пагрозаў значна павялічылася», – расказаў Латушка 20 снежня 2024 года пасля дачы паказанняў у Акруговай пракуратуры Варшавы.
Месца перабывання Мельнікавай дагэтуль невядомае
У НАУ таксама пракаментавалі інфармацыю былога мужа зніклай спікеркі Каардынацыйнае рады пра тое, што іхныя супольныя дзеці цяпер з ім у Беларусі.
,,«Паводле інфармацыі, што мы маем ад польскіх праваахоўнікаў, яна выязджала з дзецьмі з тэрыторыі Польшчы ў Вялікую Брытанію 26 лютага. Дзе яны цяпер – нам невядома», – сказалі ў НАУ.
Датычна далейшых магчымых перасоўванняў Мельнікавай у НАУ адзначылі, што валодаюць «толькі той інфармацыяй, якую даюць праваахоўныя органы Польшчы».
Няма на гэты момант дадатковай інфармацыі пра месца перабывання Мельнікавай таксама ў прадстаўніцы «Кіберпартызанаў» Юліяны Шаметавец, фонд дапамогі якім узначальвала зніклая спікерка КР, і ў сузаснавальніка фондаў «BYhelp» і «BYSOL» Аляксея Лявончыка, які падаваў заяву аб знікненні палітыка ў паліцыю Вялікай Брытаніі.
Нагадаем, што выданню «Зеркало» 7 красавіка ўдалося пагутарыць з былым мужам палітыка, які пацвердзіў, што іхныя дочкі, сямі і трынаццаці гадоў, сапраўды цяпер разам з ім на тэрыторыі Беларусі. Пры гэтым ён сказаў, што з былой жонкаю кантактаваў «даўно ўжо» і не мае «ўяўлення, куды яна магла знікнуць».
Між тым кіраўнік НАУ 7 красавіка атрымаў адказ на дасланы раней запыт, згодна з якім папярэдняе вядзенне пра знікненне Мельнікавай ажыццяўляе аддзел барацьбы з крымінальным тэрорам і забойствамі Камендатуры сталічнай паліцыі Варшавы. Больш праваахоўныя органы Польшчы не даюць дадатковых дэталяў пра хаду расследавання.
Пра знікненне спікеркі Каардынацыйнае рады сталася вядома ўвечары 28 сакавіка. Сувязі з ёй няма з 25 сакавіка. Кіраўнік НАУ Латушка 29 сакавіка расказаў, што былы муж Мельнікавай выехаў у Беларусь, а 31 сакавіка паведаміў, што мабільны тэлефон Анжалікі з 19 сакавіка фіксуецца на тэрыторыі Беларусі. Ейная дакладная лакацыя дасюль не вядомая.
Анатоль Лябедзька, дырэктар цэнтру «Еўрапейскі дыялог», мяркуе, што шанцы на тое, што спікерка Каардынацыйнае рады цяпер у бяспецы, вельмі малыя. Ён адзначыў, што трэба разумець: мы цяпер «у стане вайны», а Мельнікава не нейкі «шараговы ваяка». Яе ён назваў «палітычным генералам» і зазначыў, што гэта дае рэжыму перавагі. Галоўным падазраваным у знікненні спікеркі КР называе ўлады Беларусі і юрыст, дэлегат Каардынацыйнай рады Міхаіл Кірылюк.
Макар Мыш belsat.eu
