Грамадзянка Беларусі Дар’я Мікалаеўна Астапенка 1987 года нараджэння была асуджаная ў Польшчы за шпіянаж на невялікі тэрмін – 20 месяцаў. Па судзе ёй заставаўся месяц пазбаўлення волі да магчымасці прасіць датэрміновае вызваленне. Яе адпусцілі на час апеляцыі – і яна ўцякла.
Акруговы суд варшаўскага раёну Прага расказаў «Белсату», што рабіў унёсак аб пачатку міжнароднага вышуку грамадзянкі Беларусі Дар’і Астапенкі з мэтай яе экстрадыцыі або перадачы Польшчы. Іншых звестак у судзе не могуць даць праз характар справы.
У публічнай базе «чырвоных апавяшчэнняў» Інтэрполу Астапенкі няма. Гэта не азначае, што Інтэрпол не прыняў яе ў вышук. Частка базы непублічная, а ў публічнай няма, напрыклад, грамадзянаў Беларусі, на якіх давалі «чырвонае апавяшчэнне» за захоп самалёта «Ryanair».
Польская паліцыя сёлета ў лютым размясціла абвестку пра вышук грамадзянкі Беларусі Дар’і Мікалаеўны Астапенкі 1987 года нараджэння. Яна была асуджаная на турэмнае зняволенне тэрмінам 1 год 8 месяцаў (20 месяцаў) з надзвычайным змякчэннем. Перыяд часовага затрымання і ўтрымання пад вартаю з 20.12.2023 да 10.09.2024 быў залічаны ў тэрмін пакарання. Гэта амаль дзевяць месяцаў з прысуджаных ёй дваццаці. А значыць, яна магла пачакаць крыху больш за месяц і папрасіць пра датэрміновае вызваленне. Але Дар'я не з’явілася для адбывання пакарання і не зрабіла ў належны час плацяжу памерам 15,5 тысячы злотых. Дзе яна можа быць цяпер, невядома.
Астапенку затрымалі ў Лодзі ў снежні 2023 года, западозрыўшы ў працы на Камітэт дзяржаўнай бяспекі Беларусі. Беларускія медыі высветлілі, што гэта былая актывістка «Гавары праўду» з Баранавічаў і колішняя давераная асоба кандыдата на прэзідэнцтва Андрэя Дзмітрыева. Ветэрынарка з адукацыі, Дар'я падпрацоўвала мадэллю на сайце для дарослых «OnlyFans». Сцвярджалася, што ў смартфоне жанчыны былі знойдзеныя доказы ейнай супрацы з Камітэтам дзяржаўнай бяспекі яшчэ з 2017 года.
Па пераездзе ў Польшчу беларуска спрабавала наладзіць кантакты з актывістамі беларускай дыяспары, трапіць у арганізацыі, прапаноўваючы валанцёрскую дапамогу, збірала інфармацыю пра Паспалітае рушэнне, беларускіх добраахвотнікаў ва Украіне і тых, хто ім дапамагае. Дар’я выдала сябе, калі падчас нецвярозай размовы прагаварылася знаёмым пра сапраўдныя мэты актыўнасці ў Польшчы. Пасля гэтага інфармацыю пра жанчыну перадалі ў польскае Агенцтва ўнутранай бяспекі, у той жа дзень яе затрымалі.
Дар’я Форман, Алесь Наваборскі belsat.eu
