Польшча перадала Украіне больш за 200 танкаў Т-72 і некалькі дзясяткаў баявых машынаў пяхоты, паведамляе «Польскае радыё».
Раней такія ж танкі перадала Украіне Чэхія.
«Спасылаючыся на паведамленне прэм’ера Матэўша Маравецкага адносна ваеннай дапамогі ўкраінскаму боку, яна перавысіла ўжо 7 мільярдаў злотых (1,6 млрд еўраў)», – заявіў намеснік міністра абароны Польшчы Войцех Скуркевіч.
Таксама паведамляюць, што ўсяго ў Польшчы ёсць амаль 400 адзінак танкаў Т-72, частка з якіх у 2019 годзе была мадэрнізаваная, у асноўным палепшылі агнявую моц.
Украіне найперш перадалі танкі, якія не прайшлі мадэрнізацыі.
Акрамя танкаў, Польшча таксама паставіла ва Украіну самаходныя гаўбіцы 2С1 «Гваздзік», ракетныя сістэмы залпавага агню «Град», ракеты «паветра – паветра» для самалётаў МіГ-29 і Су-27. Таксама ва Украіну даставілі беспілотнікі польскай вытворчасці «WB Electronics», дроны «Warmate», пераносныя зенітна-ракетныя комплексы «Пярун» і вялікую колькасць боепрыпасаў.
АД belsat.eu