Польшча створыць на мяжы з Беларуссю буферную зону з 4 чэрвеня. Пра гэта распавёў кіраўнік Міністэрства абароны Польшчы Уладзіслаў Касіняк-Камыш. Такая зона азначае часовую забарону на знаходжанне ў памежнай зоне.
Буферная зона будзе ахопліваць Гайнаўскі і Беластоцкі раёны. У агульнай складанасці яна будзе ўведзена ў 27 месцах, у асноўным у Гайнаўскім раёне і ў адным месцы – у Беластоцкім.
Аднаўленне буфернай зоны неабходна для забеспячэння лепшай абароны мяжы і павышэння бяспекі супрацоўнікаў, якія яе ахоўваюць, лічаць польскія ўлады.
Уладзіслаў Касіняк-Камыш заявіў, што бяспека з’яўляецца прыярытэтам для ўрада, але эканоміка таксама важная. Таму польскія ўлады гатовыя дапамагаць бізнесу ў памежжы.
Ён таксама адзначыў, што многія кампаніі выйграюць ад будаўніцтва «Усходняга шчыта» і пашырэння памежных умацаванняў. Ён дадаў, што цяпер прадпрыемствы сферы паслуг, такія як гасцініцы і рэстараны, зарабляюць на абслугоўванні вайскоўцаў:
«Нам патрэбныя такія месцы абслугоўвання для салдат і афіцэраў, таму мы будзем аказваць такую падтрымку, і калі ёсць неабходнасць падтрымаць прадпрымальнікаў у памежнай зоне, мы адкрытыя для гэтага».
Буферная зона ўжо дзейнічала на мяжы з Беларуссю ў 2021 і 2022 гадах праз міграцыйны крызіс.
Арсен Рудэнка belsat.eu
