У нядзелю 8 студзеня адбыўся чарговы абмен палоннымі паміж Украінай і Расеяй. Ва Украіну вярнуліся 50 байцоў ЗСУ, у тым ліку абаронцы Марыупалю. Пра паспяховы абмен паведаміў кіраўнік Офісу прэзідэнта Украіны Андрэй Ермак.
«33 афіцэры і 17 шарагоўцаў і сяржантаў. Вяртаем людзей, якія трапілі ў палон на Чарнобыльскай АЭС, а таксама абаронцаў Марыупалю, хлопцаў з Данецкай вобласці, з-пад Бахмуту, а таксама з Кіеўшчыны, Чарнігаўшчыны, Херсоншчыны ды іншых рэгіёнаў, дзе працягваліся баі», – напісаў Андрэй Ермак.
Ён адзначыў, што гэта не апошні абмен і што галоўнай задачай ёсць вяртанне ўсіх палонных украінскіх вайскоўцаў.
Крыху раней 8 студзеня Мінабароны Расеі паведаміла пра вяртанне з палону 50 вайскоўцаў расейскай арміі.
«8 студзеня ў выніку перамоўнага працэсу з падкантрольнай кіеўскаму рэжыму тэрыторыі былі вернутыя 50 расейскіх вайскоўцаў, якім у палоне пагражала смяротная небяспека», – гаварылася ў паведамленні ведамства.
За час поўнамаштабнай вайны з РФ з расейскага палону ўкраінцам удалося вызваліць каля 1600 чалавек. Як паведамлялі ў Мінрэінтэграцыі Украіны, гэта 1464 вайскоўцы і 132 цывільных грамадзянаў.
Зміцер Міраш belsat.eu