У цэнтры Магілёва ў ходзе рамонтных работ выяўлена больш за 3,5 тысяч касцяных парэшткаў, паведамляе Дзяржкамітэт судовых экспертыз.
Гэта адбылося ў канцы сакавіка пры закапванні катлавана на скрыжаванні вуліцы Карпінскага і Медыцынскага завулка, удакладнілі ў ведамстве.
«У рамках судовай медыка-крыміналістычнай экспертызы касцяных парэшткаў даследавана больш за 3 600 аб’ектаў: рэбры, чарапы, трубчастыя косткі, пазванкі, ніжнія сківіцы і інш. Устаноўлена, што яны з’яўляюцца чалавечымі і адносяцца да не менш за 124 чалавек. Характар змены дадзеных касцяных парэшткаў паказвае на тое, што даўнасць пахавання складае звыш 70 гадоў», – гаворыцца ў паведамленні.
На некаторых касцяных аб’ектах судэкспертамі «выяўленыя сляды, якія могуць сведчыць аб перанесенай хірургічнай аперацыі (ампутацыі канечнасці)».
Адзначаецца, што будзе праведзеная экспертыза касцяных парэшткаў, якія «пазней выяўленыя на гэтай жа тэрыторыі».
Ася Саковіч belsat.eu