Польшча назвала прымальным адсотак адмоваў беларусам у візах. Ён адзін з самых высокіх сярод краінаў ЕЗ
У МЗС Польшчы пракаментавалі «Белсату» статыстыку Еўракамісіі пра выдаванне шэнгенскіх візаў у Беларусі амбасадамі краінаў ЕЗ. У ведамстве заявілі, што адсотак адмоваў не выклікае нараканняў, хаця гэты паказнік амбасады і консульстваў Польшчы – адзін з самых высокіх сярод іншых шэнгенскіх краінаў.
Паводле звестак Еўракамісіі, летась беларусы атрымалі 158 тысячаў візаў, 31 тысячу выдала амбасада і консульствы Польшчы. Больш візаў далі Нямеччына і Італія (52 і 40 тысячаў адпаведна).
І калі ў нямецкай амбасадзе адхілілі 0,8% заявак, а ў італьянскай – 0,2%, то польскія консулы – ад 10% да 13,3%.
Таксама высокі адсотак адмоваў беларусы зазналі ад Эстоніі (8,8%) і Латвіі (11,4%).
У міністэрстве замежных справаў Польшчы ў адказ на запыт «Белсату» заявілі, што колькасць адхіленых хадайніцтваў на візу нельга лічыць высокаю:
«Адсотак на гэтым узроўні не выклікае нараканняў, а пастанова аб выдаванні візы залежыць ад пададзеных дакументаў і добранадзейнасці заяўніка».
У МЗС таксама нагадалі, што консул абавязаны адмовіць у візе ў шмат якіх выпадках, напрыклад, калі заяўнік не даказаў мэты і ўмоваў перабывання або калі ўзнікаюць сур’ёзныя сумневы ў сапраўднасці пададзеных дакументаў ці ў тым, што асоба плануе вярнуцца ў Беларусь да канца тэрміна дзеяння візы.
«Падчас працэдуры консул вывучае інфармацыю, што маецца, для прыняцця пастановы ў справе, ацэньвае заяўленую мэту і ўмовы перабывання, а таксама пэўнасць сцвярджэнняў заяўніка на візу», – адзначылі ў МЗС.
Сцяпан Кубік belsat.eu
