Самалёт «Белавіі» Boeing 737-3Q8 (EW-254PA), які 8 чэрвеня раніцай вылецеў рэйсам BRU939 Менск – Санкт-Пецярбург, развярнуўся ў раёне Полацку і вярнуўся ў Нацыянальны аэрапорт «Менск», паведамляе тэлеграм-канал «МотолькоПомоги».
Па інфармацыі тэлеграм-каналу, у самалёта, пафарбаванага па матывах гульні «World of tanks» – так званага «танкалёта», наўпрост у палёце трэснула лабавое шкло.
Раней тэлеграм-канал «ОтВинта | Авиация Беларуси» паведамляў, што ў іншага самалёта «Белавіі» – Embraer E195LR (EW-400PO), які выконваў рэйс з Менску ў Кутаісі ў ноч з 2 на 3 чэрвеня, узнікла праблема з наддувам кабіны. У выніку самалёт прыляцеў у Грузію са спазненнем на паўгадзіны. Няспраўнасць ліквідавалі механікі ў аэрапорце «Кутаісі».
Марыя Міхалевіч belsat.eu
