Арганізацыя былых сілавікоў «BELPOL» апублікавала дадзеныя пра яшчэ адну беларускую кампанію, якая зарабляе на вайне ва Украіне. Гаворка вядзецца пра менскую ТАА «Рухсервамотар», якая сярод іншага вырабляе камплектуючыя, што выкарыстоўваюцца ў расейскіх танках.
ТАА «Рухсервамотар» – гэта прыватная кампанія, якая займаецца вытворчасцю камплектуючых да прыцэлаў камандзіра панарамных (ПКП), што выкарыстоўваюцца ў расейскіх танках Т-72 і Т-90. У прыватнасці, «Рухсервамотар» пастаўляе ротары і статары для рухавікоў ПКП.
Паводле інфармацыі «BELPOL», канцавым спажыўцом прадукцыі «Рухсервамотар» з’яўляецца беларуская кампанія «Пеленг», якая знаходзіцца пад санкцыямі Злучаных Штатаў і Еўразвязу, а таксама шэраг расейскіх кампаніяў ваенна-прамысловага комплексу Расейскай Федэрацыі. У прыватнасці, ніжнетагільскі «Уралвагонзавод», «Валагодскі оптыка-механічны завод», кампанія «Збройныя майстэрні», «НПК «Канструктарскае бюро машынабудавання» і «41 Цэнтральны завод чыгуначнай тэхнікі» з Падмаскоўя, тульскае «КБ Прыборабудавання» і іншыя.
«BELPOL» сцвярджае, што дзякуючы беларускаму прадпрыемству «Рухсервамотар» у Расеі з 2022 па цяперашні час было мадэрнізавана, зроблена і адрамантавана каля 600 танкаў Т-72 і Т-90.
Пры гэтым «Рухсервамотар» удаецца працаваць не толькі з расейскімі партнёрамі, але і заходнімі – у Нямеччыне («SIEMENS» і «INA»), Італіі («SAE Group»), Канадзе («Acculogic»). На сайце ў «Рухсервамотар» таксама згадваюцца кампаніі, якія ўваходзяць у сетку дылераў: «PARKEM AG» (Швейцарыя), «KML LINEAR MOTION TECHNOLOGY GmbH» (Аўстрыя), «INTECH CORPORATION» (Карэя), «Taiwan Servo Dynamics Co., Ltd». (Тайвань), «Taiwan Servo Dynamics Co., Ltd». (Турцыя).
Свае сувязі з расейскім ваенпрамам «Рухсервамотар» імкнецца схаваць, піша «BELPOL». Верагодна, таму з дэталяў рухавіка прыцэла ў студзені 2024 года знік надпіс «Ruchservomotor Ltd. Made in Belarus».
Для таго каб не страціць заходнія кантракты, «Рухсервамотар» «знайшоў для сябе фірму-пракладку – ТАА «Лабараторыя адытыўных тэхналогіяў» (г. Менск), праз якую і робіцца адгрузка камплектуючых да прыцэлаў для расейскай ваеннай тэхнікі», – піша «BELPOL».
Акрамя таго, разам з «Лабараторыяй адытыўных тэхналогіяў» «Рухсервамотар» стварае схемы паставак іншых замежных камплектуючых для ПКП, напрыклад, абсалютных аптычных энкодэраў.
Так, арганізацыі «BELPOL» стала вядома, што «Рухсерваматор» разам з «Лабараторыяй адытыўных тэхналогіяў» настойліва спрабуюць набыць у Кітаі для падсанкцыйнага прадпрыемства «Пеленг» тысячу энкодэраў, неабходных для вытворчасці танкавых прыцэлаў камандзіра панарамных.
У дадзены ж момант на прадпрыемстве вядзецца праца над стварэннем яшчэ 200 камплектаў дэталяў да прыцэлаў камандзіра панарамных, якія будуць выкарыстоўвацца ў расейскіх танках. Гэтыя дэталі будуць пастаўляцца з чэрвеня 2024 па студзень 2025 года роўнымі партыямі.
Вядома, што ўладальнікамі прыватнай кампаніі «Рухсервамотар» з’яўляюцца грамадзяне Беларусі Аляксандр Жарскі (дырэктар) і Сяргей Сідарук (намеснік дырэктара). Цікава, што адзін з сузаснавальнікаў «Рухсервамотар» – гэта брат Аляксандра Жарскага – Уладзімір Жарскі, які таксама з’яўляецца дырэктарам кампаніі ТАА «РУХТЭХ», якая належыць карпарацыі «АЙ-ПІ-ДЖЫ Фотанікс Карапарэйшн» (ЗША).
У выкрывальніцкім матэрыяле «BELPOL» адзначае, што ўсю атрыманую інфармацыю пра дзейнасць «Рухсервамотар» перадаў замежным партнёрам кампаніі з прапановай перагледзець свае камерцыйныя адносіны з беларускім партнёрам.
Нагадаем, што нядаўна «BELPOL» выступіў з расследаваннем, у якім расказвае, як прадпрыемствы, падкантрольныя Аляксандру Лукашэнку, дапамагаюць беларускаму рэжыму ўдзельнічаць у вайне супраць Украіны і абыходзіць міжнародныя санкцыі.
Фота на вокладцы: Будынак «Рухсервамотар» у Менску. Крыніца: yandex.by
Раман Шавель belsat.eu