Галоўныя хаўруснікі Украіны ў Еўропы пасля перамоваў у Мадрыдзе выступілі з сумеснай дэкларацыяй адносна міру і вайны на кантыненце. Дакумент падпісалі міністры замежных справаў Нямеччыны, Францыі, Італіі, Польшчы, Іспаніі, Вялікай Брытаніі, а таксама Вярхоўная прадстаўніца Еўрапейскага Звязу ў замежных справах і палітыцы бяспекі.
У дэкларацыі, тэкст якой сярод іншага апублікаваны на сайце МЗС Польшчы, адзначаецца, што пакуль Украіна дэманструе «сваю цвёрдую прыхільнасць міру», Расея «працягвае атакі на ўкраінскія гарады і інфраструктуру». Таму, каб найлепш «падтрымаць усёабдымны, справядлівы і трывалы мір ва Украіне, які жыццёва важны для Украіны, для Еўропы і для ўсёй міжнароднай супольнасці», падпісанты дамовіліся пра працяг палітычнага, фінансавага, эканамічнага, гуманітарнага, вайсковага і дыпламатычнага падтрымання Украіны сумесна з міжнароднымі партнёрамі. Новыя канкрэтныя рашэнні могуць быць прынятыя 11 красавіка.
,,«Мы таксама гатовыя аказаць далейшы ціск на Расею, выкарыстоўваючы ўсе наяўныя інструменты, уключаючы прыняцце новых санкцыяў, каб перашкодзіць ёй весці агрэсіўную вайну і забяспечыць Украіну ў найлепшай магчымай пазіцыі для забеспячэння справядлівага і трывалага міру», – гаворыцца ў дэкларацыі.
Таксама краіны-падпісанты працягнуць прыцягнення ў межах адмысловага трыбуналу Расеі да адказнасці за злачынствы, учыненыя ў сувязі з вайной Расеі супраць Украіны, патрабаваць абмену вайсковапалонных, вызвалення цывільных асобаў і вяртання ўкраінскіх дзяцей, «незаконна дэпартаваных і перададзеных у Расею і Беларусь».
«Мы гатовыя ўнесці свой уклад, каб дасягнуць гэтага міру. Еўропа ў цяперашні час забяспечвае амаль дзве траціны ўсяго падтрымання Украіны і 60 % вайсковай дапамогі. Мы пацвярджаем нашу непарушную прыхільнасць NATO як аснове еўраатлантычнай бяспекі і абавязуемся ўзяць на сябе вялікую адказнасць за будучыню бяспекі і абароны Еўрапейскага кантынента, імкнучыся да значнага выніку на саміце ў Гаазе», – гаворыцца ў дакуменце.
Тым часам прэзідэнт ЗША Доналд Трамп пасылае даволі супярэчлівыя сігналы. З аднаго боку ён «вельмі злы» на кіраўніка Расеі Уладзіміра Пуціна і пагражае таму другасным мытам на расейскую нафту, калі пагадненне аб спыненні агню не будзе нарэшце падпісанае. З другога боку палітык абяцае «вялікія праблемы» прэзідэнту Украіны Уладзіміру Зяленскаму, калі той выйдзе з угоды аб рэдказямельных металах.
Якуб Хруст belsat.eu
