Прэзідэнт ЗША Доналд Трамп зрабіў гучную заяву адносна магчымасці выхаду прэзідэнта Украіны Уладзіміра Зяленскага з пагаднення аб здабычы карысных выкапняў. Маўляў, калі Кіеў адмовіцца ад угоды, гэта можа прывесці да «вялікіх праблемаў» для Зяленскага.
Пра гэта Доналд Трамп заявіў на борце свайго самалёта падчас размовы з прадстаўнікамі медыяў.
,,«Ён спрабуе выйсці з угоды аб рэдказямельных металах, і калі ён гэта зробіць, у яго ўзнікнуць праблемы – вялікія, вялікія праблемы», – заявіў Трамп, словы якога прыводзіць агенцтва «Reuters».
Акрамя таго, амерыканскі лідар выказаўся наконт еўраатлантычных памкненняў Украіны. «Ён хоча быць сябрам NATO, але ён ніколі не станецца чальцом NATO. Ён гэта разумее», – дадаў ён падчас размовы з журналістамі.
Паводле сусветных медыяў, на мінулым тыдні ЗША прэзентавалі Кіеву абноўлены праект пагаднення, якое прадугледжвае амаль поўны кантроль амерыканскага боку над усімі радовішчамі карысных выкапняў Украіны. Пры гэтым Кіеў не атрымае ніякіх гарантыяў бяспекі.
Зяленскі пацвердзіў, што ягоная адміністрацыя атрымала гэты дакумент. 28 сакавіка ён заявіў, што Украіна атрымала праект пагаднення ад Злучаных Штатаў, але гэта зусім іншы дакумент, у якім прапісана шмат з таго, пра што «не казалася, а таксама з’явіліся некаторыя рэчы, якія раней бакі ўжо адкідвалі».
Пагадненне планавалася падпісаць у той жа дзень, калі ў Белым доме адбылася жорсткая перапалка паміж Трампам, Зяленскім і віцэ-прэзідэнтам ЗША Джэй Ды Вэнсам. Цяпер пытанне кантролю над украінскімі карыснымі выкапнямі робіцца ўсё больш напружаным у стасунках паміж Вашынгтонам і Кіевам.
Раман Шавель belsat.eu
