Пакуль яшчэ чакаюцца вынікі экспертнага разбору, звязанага з аднаўленнем падзеяў падчас аварыі аўтобуса, у якой пацярпелі беларус і ўкраінцы, 29 красавіка ў Польшчы. Пра гэта «Белсату» распавялі ў акруговай пракуратуры Варшавы ва Урсынаве.
«Цяпер збіраецца медычная дакументацыя ў дачыненні некалькіх пацярпелых і запытваюцца высновы судова-медычных экспертаў з мэтай вызначэння характару траўмаў, атрыманых пацярпелымі ў хадзе інцыдэнту. Прычыны здарэння будуць вызначаныя на падставе высноваў эксперта ў галіне рэканструкцыі дарожна-транспартных здарэнняў», – паведамляе пракуратура.
Адзначаецца, што пакуль немагчыма назваць дату завяршэння расследавання, бо шмат удзельнікаў справы і экспертных высноваў.
Аўтобус беларускай кампаніі «VisitTour», што ехаў з Менску ва Вроцлаў, трапіў у двайную аварыю 29 красавіка каля варшаўскага аэрапорту імя Фрэдэрыка Шапэна. Аўтобус з'ехаў з дарогі на павароце, урэзаўся ў агароджу і перакуліўся на бок. Калі на месца здарэння прыехалі ратавальнікі, у пажарную машыну ўрэзаўся грузавік.
У выніку пацярпелі 14 асобаў. Яны атрымалі траўмы без пагрозаў жыццю. Пацярпелі пераважна жыхары Украіны, а таксама адзін беларус, адзін іспанец і трое палякаў.
Паводле справы аб аварыі вядзецца расследаванне на падставе ч. 1 арт. 173 Крымінальнага кодэксу Польшчы. Артыкул прадугледжвае пазбаўленне волі да трох гадоў тым, «хто, парушыўшы, нават ненаўмысна, правілы бяспекі на сушы, вадзе або ў паветры, ненаўмысна робіцца прычынай няшчаснага выпадку, у выніку якога іншай асобе нанесеная шкода здароўю».
Паліцыя Польшчы не выключала, што прычынаю аварыі магла быць перавышаная хуткасць або тое, што кіроўца заснуў за стырном. Пры гэтым кіроўцы аўтобуса і грузавіка былі цвярозыя.
Арсен Рудэнка, Дар’я Форман belsat.eu
