У акруговай управе паліцыі Варшавы «Белсату» расказалі, што вядзецца расследаванне факту дарожна-транспартнага здарэння з удзелам пасажырскага аўтобуса, што адбылося раніцай 29 красавіка каля аэрапорту польскае сталіцы.
У варшаўскай паліцыі адзначылі, што ў справе аварыі вядзецца расследаванне паводле ч. 1 арт. 173 Крымінальнага кодэксу Польшчы. Нагляд за расследаваннем ажыццяўляе акруговая пракуратура Варшавы ва Урсынаве.
Згаданы артыкул прадугледжвае пазбаўленне волі да трох гадоў таму, «хто, парушыўшы, нават ненаўмысна, правілы бяспекі на сушы, вадзе або ў паветры, ненаўмысна робіцца прычынай няшчаснага выпадку, у выніку якога іншай асобе нанесеная шкода здароўю».
Аўтобус беларускай кампаніі «VisitTour», што ехаў з Менску ва Вроцлаў, раніцай 29 красавіка трапіў у двайную аварыю каля варшаўскага аэрапорту імя Фрэдэрыка Шапэна. Аўтобус ехаў хуткаснай трасай S2 пад Варшаваю, каля 3-й гадзіны ночы ён, выязджаючы на трасу S79, з’ехаў з дарогі на павароце, урэзаўся ў агароджу і паваліўся на бок. На месца здарэння прыехалі ратаўнікі. Падчас дапамогі пацярпелым у пажарную машыну ўрэзаўся цяжкавік.
У выніку дзвюх аварыяў пацярпелі і трапілі ў шпіталі 14 асобаў, усе з траўмамі, што не пагражаюць жыццю. У больніцы апынуліся грамадзяне Беларусі і Украіны, таксама быў шпіталізаваны адзін пажарны.
У аўтобусе было 26 асобаў і кіроўца. Пацярпелі пераважна жыхары Украіны, але таксама адзін беларус, адзін іспанец і трое палякаў. Самаму маладому ўдзельніку аварыі 17 гадоў, найстарэйшаму – 59. За стырном цяжкавіка, што ўрэзаўся ў пажарную машыну, быў 49-гадовы грамадзянін Украіны.
Што да прычынаў аварыі, то паліцыя не адкідвае, напрыклад, версіі перавышэння хуткасці ці таго, што кіроўца заснуў за стырном. Кіроўцы аўтобуса і цяжкавіка былі цвярозыя, дадалі ў паліцыі. У кампаніі «VisitTour» адмовіліся каментаваць здарэнне.
Пасажырскія аўтобусы, што едуць з Беларусі ў Польшчу, нярэдка мусяць стаяць у чэргах на мяжы шмат гадзінаў. Паводле чату, прысвечанага пераходу мяжы, цяпер з беларускага боку заезду ў Польшчу чакае 70 аўтобусаў. Раней выкліканая гэтым стома кіроўцаў называлася прычынаю такіх аварыяў.
Дар’я Форман, Якуб Хруст belsat.eu
