У судзе Першамайскага раёну Менску 30 траўня ў закрытым рэжыме судзілі 78-гадовую актывістку Ніну Багінскую. Як даведаўся «Белсат», яе вызвалілі без пакарання, а крымінальную справу спынілі.
Суд над Нінай Багінскай пачаўся ў 10:30, трываў прыблізна дзве гадзіны і скончыўся вызваленнем актывісткі і спыненнем крымінальнай справы, паведамілі крыніцы «Белсату». Суддзя прызначыў Багінскай «прэвентыўны нагляд».
На судовае паседжанне нікога не пусцілі, у тым ліку прадстаўнікоў дыпламатычных місіяў. Такое рашэнне прыняў суддзя Максім Трусевіч, які раней выносіў палітычна матываваныя прысуды дзясяткам актывістам. Магчыма, суддзя ўлічыў у рашэнні ўзрост Багінскай, нязначнасць «правапарушэння» (значак на каўнерыку паліто) і ўжыў артыкул 79 КК – «Асуджэнне без прызначэння пакарання».
78-гадовую актывістку вінавацілі паводле ч. 2 арт. 342 КК РБ – «Неаднаразовае парушэнне закону аб правядзенні масавых мерапрыемстваў». У аснове абвінавачання былі адміністратыўныя пратаколы і судовыя пастановы за 2024 год. Усе яны датычаць выкарыстання нацыянальнай сімволікі, і адзін пратакол быў складзены за майку з надпісам: «Не вайне!».
Багінская прынесла з сабой на паседжанне дыск з запісам прамовы Аляксандра Лукашэнкі. 20 кастрычніка 2020 года ён сказаў пра актывістку: «Вы глядзіце толькі Ніну Багінскую не забірайце з плошчаў».
Ніна Багінская мае вялікія праблемы са здароўем, у яе некалькі цяжкіх хранічных захворванняў. Усе дакументы, якія пацвярджаюць дыягназы, яна мела з сабою.
Любоў Лунёва belsat.eu
