Суд Маскоўскага раёну Берасця прызнаў замежнага грамадзяніна вінаватым паводле ч.2 арт.228 КК («Кантрабанда») за тое, што ён перавозіў праз мяжу 50 тысяч долараў ЗША, якія не задэклараваў. Абвінавачаны атрымаў штраф, а грошы канфіскавалі, піша прэсавая служба Генпракуратуры.
Яшчэ летась у снежні мытнікі выявілі ў замежнага грамадзяніна, які ехаў праз памежны пераход «Варшаўскі мост» 50 тысяч долараў ЗША. Грошы 30-гадовы мужчына схаваў у асабістых рэчах.
Пракуратура таксама паведамляе, што нібыта грошы абвінавачаны атрымаў ад знаёмай у Польшчы і павінен быў даставіць іх ва Украіну. Але якім чынам мужчына збіраўся з Беларусі выехаць ва Украіну – не паведамляецца, у той час, як паміж Польшчай і Украінай надалей працуюць памежныя пераходы.
Тым не менш абвінавачаны прызнаў сваю віну. У выніку суддзя суда Маскоўскага раёну Берасця прызнаў мужчыну вінаватым паводле ч.2 арт.228 КК («Кантрабанда») і прызначыў пакаранне ў выглядзе штрафу ў памеры 500 базавых велічыняў (18500 рублёў).
Грошы ў грамадзяніна замежнай краіны канфіскавалі.
Алена Аляксандрава belsat.eu