Здарэнне на рэйсе Лондан – Сінгапур: адзін пасажыр загінуў і 30 атрымалі траўмы
Адзін чалавек загінуў і яшчэ некалькі дзясяткаў атрымалі раненні на самалёце кампаніі «Singapore Airlines», які ляцеў рэйсам з Лондану ў Сінгапур і трапіў у моцную турбулентнасць.
Як паведамляе прэс-служба авіякампаніі, падчас палёту лайнер «Boeing 777-300ER» трапіў у зону моцнай турбулентнасці і быў перанакіраваны ў Бангкок.
У выніку здарэння на борце адзін чалавек загінуў і яшчэ не менш за 30 пацярпелі (з іх 12 цяпер у лякарні).
Усяго на борце самалёта былі 211 пасажыраў і 18 чальцоў экіпажу.
Пакуль дэталі інцыдэнту невядомыя.
Турбулентнасць у палёце – справа звычайная і, як правіла, не выклікае вялікіх праблемаў. Сур’ёзныя інцыдэнты, тым больш са смяротным вынікам, здараюцца вельмі рэдка.
Звычайна ў выпадку набліжэння да зоны турбулентнасці пілот папярэджвае пасажыраў аб неабходнасці заставацца на месцах і прышпіліць рамяні. Аднак бывае, што турбулентнасць узнікае раптоўна і экіпаж аказваецца да гэтага не гатовы.
Глеб Нержын belsat.eu
