Міністэрства аховы здароўя створыць спецыяльную камісію, якая будзе ўзгадняць пераразмеркаванне і перанакіраванне выпускнікоў медычных ВНУ і маладых спецыялістаў. Гэта прадугледжвае пастанова міністэрства № 44 ад 17 сакавіка 2023 года, піша Reform.by. 14 чэрвеня пастанова набывае моц.
Склад камісіі будзе зацвярджацца Міністэрствам аховы здароўя. Яе чальцы будуць ацэньваць наяўнасць падставаў і выкананне ўмоваў для пераразмеркавання ці перанакіравання. Камісія зможа запытваць меркаванне галоўных упраўленняў аховы здароўя пры выканкамах, цэнтраў гігіены і эпідэміялогіі, «Белфармацыі» ды інш.
У кампетэнцыі камісіі будуць уваходзіць рашэнні:
- аб размеркаванні выпускнікоў, маладых спецыялістаў, якіх прынялі камісіі медычных універсітэтаў;
- аб пераразмеркаванні выпускнікоў, маладых спецыялістаў, прынятых камісіямі медычных каледжаў;
- аб перанакіраванні на працу выпускнікоў, маладых спецыялістаў, якіх прынялі камісіі медычных універсітэтаў.
Пастанова зацвярджае пералік дакументаў, якія трэба падаць у камісію для ўзгаднення рашэнняў. Паседжанні камісіі будуць адбывацца не радзей за адзін раз на месяц.
У Беларусі цягам апошніх трох гадоў расце дэфіцыт медычных кадраў, медыкі ўсіх спецыяльнасцяў масава з’язджаюць за мяжу.
Марыя Міхалевіч belsat.eu
