У Аб’яднаным пераходным кабінеце распавялі аб працы над альтэрнатыўным пашпартам грамадзяніна Беларусі. Плануецца, што ім будуць карыстацца беларусы, якія з розных прычынаў не могуць аформіць афіцыйнага дакументу. Ужо распрацаваны дызайн новага пашпарту, перадае карэспандэнт «Белсату».
Прадстаўнік Аб’яднанага пераходнага кабінету ў міжнародных справах Валерый Кавалеўскі паведаміў, што прасоўванне альтэрнатыўнага беларускага пашпарта вядзецца ў сінхранізацыі з Еўракамісіяй. Ужо распрацаваны дызайн дакументу:
«Была створаная група з адмыслоўцамі ў геральдыцы, гісторыкамі, дызайнерамі. Была атрыманая вельмі важная і патрэбная падтрымка ад прыватных беларускіх донараў. Усе сродкі на гэтую ініцыятыву былі выключна беларускія. Распрацаваны дызайн гэтага дакументу».
Як распавёў Кавалеўскі на прэс-канферэнцыі Кабінету, плануецца, што пашпарт дазволіць перасякаць межы:
«Дакумент цалкам адпавядае ўсім патрабаванням Міжнароднай арганізацыі грамадзянскай авіяцыі, то бок дакумент можа быць прыдатны не толькі для таго, каб пацвярджаць беларускае грамадзянства, а таксама для выкарыстання ў паездках».
Цяпер, паводле прадстаўніка Кабінету, вядзецца праца над тым, каб гэты альтэрнатыўны пашпарт пагадзіліся прызнаваць розныя дзяржавы:
«Праект па-ранейшаму падтрымліваецца Еўракамісіяй, яны зацікаўленыя ў тым, каб гэта стала рэальнасцю, але вельмі шмат будзе залежаць ад таго, як мы выбудуем дыялог з нацыянальнымі дзяржавамі ў ЕЗ, бо рашэнне будзе залежаць менавіта ад іх пазіцыі».
Шмат якія беларусы могуць застацца без пашпартоў праз пазбаўленне грамадзянства, якое ўзаконілі цяперашнія ўлады. Акрамя таго, існуе праблема замены пратэрмінаваных пашпартоў беларусаў у эміграцыі, некаторыя асобы баяцца звяртацца ў амбасады. А ў пасольстве Беларусі ў Польшчы, напрыклад, вялікія чэргі, і чакаць прыёму для афармлення дакументаў даводзіцца месяцамі.
Сяргей Крот belsat.eu