Поўнамаштабная вайна ва Украіне трывае 1162 дні. ЗША ўсё яшчэ не выходзяць з перамоваў: Трамп верыць, што Пуцін хоча міру. Еўропа ж, падобна, не мае дастаткова сілаў, каб гарантаваць мір ва Украіне. «Белсат» расказвае, што пішуць пра вайну 30 красавіка.
Генеральны штаб Збройных сілаў Украіны 30 красавіка налічыў за мінулы дзень 177 баявых сутыкненняў. Гэта вельмі высокая інтэнсіўнасць баёў, хай і не рэкордная: у канцы мінулага года даходзіла да амаль 300 баёў за дзень. Найбольш баёў па-ранейшаму на пакроўскім напрамку, таксама шмат баёў на краматорскім, курскім, ліманскім, навапаўлаўскім напрамках.
Як адзначае амерыканскі Інстытут вывучэння вайны (ISW), пра працяг баёў у Курскай вобласці Расеі паведамляюць і ўкраінскія, і расейскія крыніцы, хоць яшчэ 27 красавіка Уладзімір Пуцін заявіў пра нібыта вызваленне Курскай вобласці. Ды ўкраінскія сілы займаюць у Курскай вобласці зусім невялікія лапікі зямлі – расейскія сілы сапраўды адваявалі большую частку расейскай тэрыторыі і нават крыху прасунуліся ў суседняй Сумскай вобласці Украіны.
Таксама расейскія войскі прасоўваюцца пад Пакроўскам, Курахавым і Вялікай Навасёлкай, украінскія – пад Тарэцкам. Галоўнакамандуючы ЗСУ Аляксандр Сырскі адзначыў, што адсутнасць перспектывы на пакроўскім напрамку не спыняе Расею: тая працягвае спробы выйсці на адміністрацыйную мяжу Днепрапятроўскай вобласці.
Страты Расеі, паводле падлікаў Генштабу ЗСУ, днём раней перавысілі 950 тысяч чалавек забітымі і цяжка параненымі. За мінулы дзень Расея страціла яшчэ 1100 чалавек, 1 танк, 1 бронемашыну пяхоты, 11 артылерыйскіх сістэмаў і 1 рэактыўную сістэму залпавага агню, 179 адзінак аўтамабільнай і 9 адзінак спецыяльнай тэхнікі.
За мінулы дзень Украіна налічыла 91 расейскі авіяўдар са 179 кіраванымі авіябомбамі, 5900 расейскіх абстрэлах, з якіх 95 – рэактыўнымі сістэмамі залпавага агню, 3186 удараў дронамі-камікадзэ. Колькасць ракетных і авіяцыйных удараў паволі расце з лютага. Паветраныя сілы Украіны паведамілі пра запуск Расеяй у ноч на 30 красавіка 108 дронаў тыпу іранскіх «Shahed», з якіх збілі 50, яшчэ 22 былі «лакацыйна страчаныя» без наступстваў. То бок, траціна «шагэдаў» дасягнула цэляў.
Расейскія абстрэлы забілі аднаго чалавека і паранілі яшчэ аднаго ў Дняпры, паранілі больш за 45 чалавек у Харкаве, паранілі аднаго чалавека ў Дабраполлі, што ў Данецкай вобласці. Пра гэта выказаўся прэзідэнт Украіны Уладзімір Зяленскі: заклікаў ціснуць на Расею і ўводзіць дадатковыя санкцыі, каб вымусіць Расею сапраўды спыніць агонь. Таксама Зяленскі зноў заявіў, што Расея «штосьці рыхтуе» пад выглядам вайсковых вучэнняў у Беларусі гэтым летам, але адзначыў, што не ведае, куды можа быць скіраваная новая атака.
Украіна, падобна, таксама адказвае ўдарамі беспілотнікамі па тэрыторыі Расеі: паводле крыніцы «Української правди», украінскія беспілотнікі патрапілі ў Мурамскі прыборабудаўнічы завод ва Уладзімірскай вобласці Расеі ў ноч на 30 красавіка. Завод называюць таксама «парахавым»: ён сярод іншага вырабляе запальнікі і запальвальныя боепрыпасы для расейскіх вайскоўцаў і спецслужбаў.
Пуцін 28 красавіка абвясціў поўнае прыпыненне баявых дзеянняў з 8 да 10 траўня ўключна. Мінулае абвешчанае Пуціным спыненне агню Расея шмат разоў парушала.
Украіна ставіцца да новай заявы Пуціна скептычна – і не толькі яна. Прадстаўнік Генеральнага сакратара Арганізацыі аб’яднаных нацыяў у адказ на заяву Пуціна сказаў, што ААН хоча бачыць не такую заяву, а сканчэнне вайны, якое грунтуецца на міжнародным праве і статуце ААН. Спецыяльны прадстаўнік прэзідэнта Злучаных Штатаў па Украіне Кіт Келаг назваў заяву Пуціна «абсурдам». ISW працягвае лічыць, што Крэмль выкарыстоўвае аднабаковыя спыненні агню для дасягнення інфармацыйных і баявых перавагаў ва Украіне і для падтрымання ілюзіі зацікаўленасці Расеі ў сапраўдных мірных перамовах.
Сам прэзідэнт ЗША Доналд Трамп працягвае казаць, што Пуцін «хоча спыніць вайну». Ён паўтарыў гэта ў інтэрв’ю «ABC News». На пытанне журналіста, ці праўда ён у гэта верыць, Трамп адказаў, што калі б не ён, Расея б захапіла ўсю Украіну, бо Пуцін «хацеў усю Украіну», але цяпер Трамп верыць, што, дзякуючы яму, Пуцін хоча спыніць баявыя дзеянні. Трампу ж, паводле ўкраінскіх сацыёлагаў, не давярае 89 % украінцаў.
Тым не менш, паводле «Bloomberg», Украіна гатовая падпісаць з ЗША ўгоду па карысных выкапнях ужо 30 красавіка. Як піша «The Economist», Зяленскі прасіў Трампа не выхадзіць з перамоваў з Расеяй і даводзіў, што Украіна гатовая да безумоўнага спынення агню, а не гатовая Расея. Паводле «Axios», Зяленскі прасіў Трампа на сустрэчы ў Ватыкане заняць больш цвёрдую пазіцыю адносна Пуціна.
Брытанскае «The Times» адзначае, што Еўропа мае праблемы з тым, каб набраць хаця б 25 тысяч вайскоўцаў для патэнцыйнай адпраўкі ва Украіну ў выпадку замірэння – надзеі на 64 тысячы вайскоўцаў у крыніцаў выдання няма. Злучанае Каралеўства, паводле выдання, можа выслаць да 10 тысяч вайскоўцаў, Францыя – 5–10 тысяч.
Алесь Наваборскі belsat.eu
