Гомельскія чыноўнікі сабралі ў гарвыканкаме аператыўны штаб, што прыняў, як заяўляецца, «важныя рашэнні» адносна пакосу пустазелля ў Гомлі. Пра гэта 10 чэрвеня паведамілі ў тэлеграм-канале кіраўніка гораду Уладзіміра Прывалава.
«У сувязі з інтэнсіўным ростам травянога покрыва ў горадзе, абумоўленым спрыяльнымі ўмовамі надвор'я, у гарвыканкаме раніцай адбылося паседжанне аператыўнага штабу для арганізацыі работаў для пакосу травы», – гаворыцца ў паведамленні.
Чыноўнікі прынялі рашэнне «аб мабілізацыі ўсіх наяўных рэсурсаў і ўзмацненні інтэнсіўнасці работаў». Пастанавілі сфармаваць адмысловыя брыгады, якія будуць паэтапна адпрацоўваць мікрараёны Гомля, забяспечваючы раўнамернае і своечасовае скошванне расліннасці.
Дадаткова даручана арганізаваць харчаванне для касцоў. Таксама пастаўленая задача прыцягнуць да кашэння травы ўсе прадпрыемствы, арганізацыі і ўстановы гораду.
Нагадаем, што ў ноч на 9 чэрвеня моцны вецер парывамі да 20 м/с, залевы і навальніцы парушылі электразабеспячэнне ў 72 населеных пунктах Гомельшчыны. Найбольш ад непагадзі пацярпелі Гомельскі, Мазырскі і Рэчыцкі раёны. У самым Гомлі начная навальніца парвала афіцыйны сцяг плошчаю 72 м² на флагштоку ў цэнтры гораду.
Якуб Хруст belsat.eu
