У ноч з 10 на 11 чэрвеня Расея і Украіна працягвалі абменьвацца атакамі дронаў. Ва Украіне лік пацярпелых цывільных асобаў ідзе на дзясяткі, вядома пра некалькіх загінулых у Харкаве.
Украінскія беспілотнікі атакавалі Тамбоўскі парахавы завод у горадзе Катоўск Тамбоўскай вобласці Расеі. Мясцовыя жыхары паведамлялі пра шматлікія выбухі. Раніцай кіраўнік вобласці Яўгеній Первышоў пацвердзіў атаку БПЛА на горад. Паводле яго, «у выніку падзення аднаго з збітых БПЛА ўзнікла ўзгаранне», абышлося без пацярпелых.
Тамбоўскі парахавы завод – адно з найбуйнейшых прадпрыемстваў, што спецыялізуецца на вытворчасці боепрыпасаў і пораху для стралковай зброі, артылерыйскіх сістэмаў, гранатамётаў, мінамётаў і танкавых снарадаў. Дроны ўжо наносілі ўдары па прадпрыемстве ў студзені 2025 года, у ліпені 2024 года і ў лістападзе 2023 года.
Міністэрства абароны Расеі заявіла, што цягам ночы расейская СПА перахапіла 32 украінскія беспілотнікі, у тым ліку пяць – над Тамбоўскаю вобласцю.
Атакі на Харкаў, Херсон і Запарожжа
Расейскія дроны ў ноч на 11 чэрвеня атакавалі Харкаў. У выніку масаванай атакі, здзейсненай 17 шагэдамі, загінулі два чалавекі, яшчэ 54 асобы атрымалі раненні, у тым ліку васьмёра дзяцей. Гарадскі галава Харкава Ігар Тэрэхаў паведаміў пра наўпроставыя траплянні ў шматпавярховыя жылыя дамы, прыватныя дамы, дзіцячыя пляцоўкі, грамадскі транспарт і прамысловыя аб'екты. У выніку абстрэлаў узніклі пажары ў жылых кватэрах, разбураныя дахі будынкаў, выгаралі аўтамабілі, выбухной хваляй выбітыя шыбы. Пашкоджаныя тралейбусы, кантактная сетка, камунальныя і вытворчыя аб'екты. Кіраўнік Харкаўскай вобласці Алег Сынегубаў заявіў пра траплянні варожых БПЛА ў тралейбуснае дэпо.
Два чалавекі атрымалі раненні ў выніку расейскага ўдару беспілотнікам у цывільны аўтамабіль у Запарожскай вобласці, заявіў кіраўнік рэгіёну Іван Фёдараў. Здарэнне адбылося ў Малакатэрынаўцы.
Шэраг летніх дамоў, аўтамабіляў і плавальных сродкаў былі пашкоджаныя ў выніку расейскіх удараў па Адэскай вобласці. Успыхнулі пажары, але абышлося без пацярпелых.
У Херсонскай вобласці расейскія ўдары пашкодзілі шматпавярховік і 10 прыватных дамоў, гаспадарчае збудаванне, гараж і прыватныя аўтамабілі. Пяць асобаў атрымалі раненні.
Нагадаем, што ў ноч на 9 чэрвеня ўкраінскія дроны атакавалі АТ «ВНИИР» у Чэбаксарах, у расейскай Чувашыі. Прадпрыемства вырабляе сістэмы рэлейнай абароны і АСК падстанцыяў, электратэхнічнае абсталяванне нізкага, сярэдняга і высокага напружання. Таксама «ВНИИР» вырабляе для расейскай арміі прымачы «Комета», якія абараняюць расейскія дроны ад украінскіх сродкаў радыёэлектроннай барацьбы. У звязку з атакаю пастанавілі прыпыніць вытворчасць.
Якуб Хруст belsat.eu
