Міністр замежных справаў Беларусі Максім Рыжанкоў на сустрэчы 10 чэрвеня ў Маскве са студэнтамі Маскоўскага дзяржаўнага інстытуту міжнародных стасункаў анансаваў афіцыйны візіт у Менск прэзідэнта Ірану Масуда Пэзэшкіяна. Пра гэта паведамляе БелТА.
Паводле кіраўніка МЗС, прэзідэнт Ірану прыляціць у Менску ў межах пасяджэння Найвышэйшага эканамічнага савету ЕАЭС 26–27 чэрвеня. Візіт пры гэтым будзе афіцыйным і закране двухбаковыя пытанні. Максім Рыжанкоў назваў Іран адным з важных прыярытэтаў для Беларусі:
,,«І не толькі ў плане гандлёва-эканамічных стасункаў. На шмат якія пытанні міжнароднага характару мы глядзім адным і тым жа позіркам. Нам вельмі важная гэтая дзяржава з пункту гледжання лагістыкі, дастаўкі нашых тавараў. Мы вельмі сочым за развіццём калідору Поўнач – Поўдзень праз Іран, бо мы вельмі спадзяёмся, што гэта павысіць нашыя магчымасці для дастаўкі нашых тавараў і ў Індыю, і ў Паўднёва-Усходнюю Азію».
Напружанне паміж ЗША і Іранам
Неўзабаве мае скончыцца двухмесячны тэрмін, які прэзідэнт ЗША Доналд Трамп даў Тэгерану на дасягненне ядравага пагаднення. 10 чэрвеня ў размове з прэм’ер-міністрам Ізраілю ён заявіў, што не хоча пакуль ужываць вайсковых метадаў супраць Ірану, бо спадзяецца на дамову з ім, паведамляе «Axios».
Раней Трамп дапусціў удар па Іране ў выпадку, калі перамовы не прынясуць вынікаў. Вашынгтон патрабуе ад Тэгерану цалкам адмовіцца ад праграмы ўзбагачэння ўрану. Іран лічыць прапанову непрымальнай, але гатовы абмежаваць яе для зняцця з сябе санкцыяў. 15 чэрвеня ў Маскаце (Аман) павінен адбыцца шосты раўнд перамоваў паміж Іранам і ЗША, паведамляе «Anadolu».
10 чэрвеня Трамп заявіў «Fox News», што Іран паводзіць сябе на перамовах «значна больш агрэсіўна», чымся некалькі дзён таму, і ён не ведае, чаму гэта адбылося. Іранскі лідар, аятала Хамэнэі ў гэты ж дзень назваў узбагачэнне ядравага паліва неад'емным правам Ірану, ад якога Тэгеран не плануе адмаўляцца, перадае «Middle East Spectator».
Кіраўнік адказнага за Блізкі Усход Цэнтральнага камандавання Збройных сілаў ЗША генерал Майкл Курыла паведаміў у Палаце прадстаўнікоў Кангрэсу ЗША, што падрыхтаваў план удару па Іране і перадаў яго міністру абароны і прэзідэнту ЗША, паведамляе «The Times of Israel».
Нагадаем, што ізраільская армія ўзмацняе рыхтаванне да магчымай ваеннай аперацыі супраць Ірану, калі перамовы паміж Вашынгтонам і Тэгеранам наконт новай ядравай дамовы зойдуць у тупік.
Якуб Хруст belsat.eu
