Падчас сваёй перадвыбарнай кампаніі прэзыдэнт ЗША Доналд Трамп абяцаў скончыць вайну Расеі супраць Украіны на працягу 24 гадзін у Белым доме, потым перанёс гэты тэрмін на красавік-травень. На 1150-ый дзень усё выглядае так, што Трамп расчараваўся і хоча самаўстараніцца з працэсу.
«Мы не збіраемся працягваць гэтыя намаганні тыднямі і месяцамі запар. Таму нам трэба вельмі хутка вызначыць цяпер, я кажу пра некалькі дзён, ці магчыма гэта здзейсніць гэта ў бліжэйшыя некалькі тыдняў, – перадае словы дзяржсакратара ЗША Марка Руб’ё Reuters. – Калі гэта немагчыма, калі мы настолькі далёкія адзін ад аднаго, што гэтага не адбудзецца, то, я думаю, прэзідэнт можа дасягнуць кропкі, калі скажа: «Ну, усё, мы скончылі».
Тры еўрапейскія дыпламатычныя крыніцы паведамілі агенцтву Reuters, што каментары Руб’ё, якія супалі з прыкметамі некаторага прагрэсу ў перамовах ЗША з Украінай, пацвярджаюць расчараванне Белага дому ад нежадання Расеі пакласці канец вайне.
«Я лічу важным нагадаць усім, што вайна ва Украіне – страшная рэч, але гэта не нашая вайна. Не мы гэта пачыналі. <…> Амаль усе першыя 100 дзён прэзідэнта былі прысвечаныя спробам на найвышэйшым магчымым узроўні дасягнуць міру. І калі гэта можа адбыцца, мы хочам дапамагчы. Але калі гэтага не адбудзецца, нам трэба ведаць цяпер, бо ў нас ёсць іншыя справы, якімі мы мусім займацца», – заявіў Руб’ё.
Нагадаем, Злучаныя Штаты 17 красавіка прадставілі еўрапейскім саюзнікам уласныя прапановы па заключэнні «мірнага пагаднення» паміж Расеяй і Украінай, якія фактычна азначалі, што ўкраінскія тэрыторыі, акупаваныя Расеяй, застануцца пад кантролем Масквы, а ЕЗ павінен паслабіць санкцыі супраць Расеі і адхіліць абмеркаванне імкнення Украіны стаць сябрам NATO, паведаміў Bloomberg.
Раней пры пасярэдніцтве ЗША Украіна і Расея прыбылі на перамовы ў Саудаўскую Аравію, што прывяло да частковага спынення агню, але не больш за тое. Вайна па-ранейшаму працягваецца, уключаючы нядаўнюю расейскую ракетную атаку на горад Сумы на паўночным усходзе Украіны, якую Трамп назваў «памылкай».
Тэса Анэйда / belsat.eu
