Беларус Аляксандр Булаты, сын палітычнага ўцекача Вадзіма Булатага, можа быць дэпартаваны з ЗША, паведамляе выданне NPR.
Аляксандр легальна прыехаў у ЗША ў 2024 годзе, падаў прашэнне аб статусе ўцекача. Прытулак у Штатах раней атрымаў бацька мужчыны Вадзім Булаты, які выехаў з Беларусі ў 2022 годзе. У Аляксандра, аднак, узніклі праблемы пасля таго, як Доналд Трамп зрабіў міграцыйную палітыку больш строгаю.
Аляксандр Булаты папрасіў прытулку ў ЗША праз праграму «CBP One», якой з 2023 года маглі карыстацца мігранты, каб хадайнічаць пра статус уцекача ў Штатах. Тыя, хто ўехаў у краіну з дапамогай праграмы «CBP One» падчас кіравання адміністрацыі Байдэна, атрымалі часовыя дазволы на пражыванне ў ЗША.
Праграма была закрытая адміністрацыяй Трампа ў студзені 2025 года. Таксама былі адкліканыя часовыя дазволы на пражыванне. У сакавіку праграму перазапусцілі пад назвай «CBP Home» – цяпер яна мае дапамагчы мігрантам у самадэпартацыі.
Бацька і сын Булатыя падалі ў суд штату Мінэсота хадайніцтва аб аб’яднанні іхных справаў, аднак Міністэрства ўнутранай бяспекі ўвогуле настаяла на спыненні справы. Пасля судовага паседжання на Аляксандра надзелі кайданкі і затрымалі, а пазней стала вядома, што ён падлягае паскоранай высылцы цягам трох дзён, распавёў Вадзім Булаты.
,,«Я зразумеў словы пракурора так, што справа закрытая і мы можам быць вольныя, – кажа Вадзім Булаты. – Я не чакаў, што гэта будзе юрыдычная пастка».
Бацька з сынам выйшлі з будынку суда, уважаючы, што іхныя справы цяпер будуць працягвацца як адна. Замест гэтага працаўнікі Іміграцыйнай і мытнай службы сустрэлі беларусаў усяго за некалькі крокаў ад выхаду з кайданкамі і сказалі Аляксандру, што ён падлягае паскоранай дэпартацыі цягам трох дзён.
Тым не менш Аляксандра пакуль не выслалі – ён застаецца за кратамі ўжо некалькі тыдняў. Бацька мужчыны спрабуе давесці, што ў Беларусі сыну пагражае палітычны пераслед. Адвакатка Аляксандра дамаглася, каб іміграцыйны суддзя зноў пачаў разгляд справы беларуса, што азначае, што найбліжэйшым часам яго не дэпартуюць.
«Мой кліент – чалавек, які не мае крымінальнага мінулага. Ён падаў заяву аб прытулку, – кажа адвакатка Аляксандра Малінда Шміхэн. – Цяпер ён утрымліваецца ў акруговай турме і будзе там некаторы час».
Вадзім Булаты распавядае пра жахлівыя ўмовы, у якіх трымаюць ягонага сына: камера перапоўненая, у ёй адначасова знаходзяцца 30 чалавек, святло не выключаецца, вязням не дазваляюць выходзіць надвор, каб падыхаць свежым паветрам.
Вадзім, які ўдзельнічаў у пратэстах у Беларусі і праз гэта атрымаў прытулак у ЗША, цяпер вельмі непакоіцца не толькі за сына, але і за сябе, жонку ды іншых сваіх дзяцей.
,,«Я ўцёк ад адной дыктатуры і не хацеў бы яшчэ адной у Амерыцы», – кажа мужчына.
Трамп пасля ўступлення на пасаду прэзідэнта ЗША распачаў барацьбу з мігрантамі. Да канца года з ЗША мусяць дэпартаваць каля мільёна замежнікаў.
6 чэрвеня ў Лос-Анджэлесе ўспыхнулі пратэсты супраць міграцыйнай палітыкі Трампа. Той у адказ увёў у горад для задушэння дэманстрацыяў Нацыянальную гвардыю і марскую пяхоту.
Марыя Міхалевіч belsat.eu
