Дзяржсакратар ЗША Маркаў Руб’ёў заявіў, што Злучаныя Штаты могуць спыніць пасярэдніцтва паміж Расеяй і Украінай, калі не адбудзецца канкрэтных крокаў у кірунку мірнага пагаднення.
ЗША чакаюць выразнага выніку перамоваў аб сканчэнні вайны ва Украіне «ў бліжэйшыя дні, не тыдні».
,,«Я лічу важным нагадаць усім, што вайна ва Украіне – страшная рэч, але гэта не нашая вайна. Не мы гэта пачыналі. <…> Амаль усе першыя 100 дзён прэзідэнта былі прысвечаныя спробам на найвышэйшым магчымым узроўні дасягнуць міру. І калі гэта можа адбыцца, мы хочам дапамагчы. Але калі гэтага не адбудзецца, нам трэба ведаць цяпер, бо ў нас ёсць іншыя справы, якімі мы мусім займацца», – заявіў Руб’ёў.
Паводле дзяржсакратара, цяпер ЗША падыходзяць да кропкі, калі трэба вырашыць, ці наагул магчыма завяршыць канфлікт ва Украіне.
«Як вы ведаеце, амбасадар Ўіткаф меў не адну, не дзве, а тры сустрэчы з Уладзімірам Пуціным, каб вызначыць расейскі пункт гледжання і зразумець, што ім спатрэбіцца, каб скончыць з гэтым. Мы – генерал Келаг, я і іншыя – неаднаразова сустракаліся з украінцамі. Такім чынам, мы прыйшлі сюды ўчора, каб абмяркоўваць больш канкрэтныя схемы таго, што можа спатрэбіцца, каб скончыць вайну, каб паспрабаваць вельмі хутка гэта высветліць. І я кажу пра некалькі дзён, а не пра некалькі тыдняў. Калі тое магчыма, мы гатовыя зрабіць усё, каб спрыяць гэтаму . Калі немагчыма, калі мы настолькі далёкія адзін ад аднаго, што гэтага не адбудзецца, то, я думаю, прэзідэнт, імаверна, падыдзе да таго моманту, калі скажа: ну што ж, мы скончылі», – заявіў дзяржаўны сакратар ЗША.
Руб’ёў таксама пракаментаваў жаданне Украіны атрымаць гарантыі бяспекі і заявіў, што «кожная суверэнная дзяржава на Зямлі мае права бараніць сябе».
«Украіна будзе мець права абараняцца і падпісваць любыя пагадненні, якіх яна хоча, на двухбаковай аснове з рознымі краінамі і гэтак далей», – адзначыў Руб’ёў і дадаў, што «здольнасць Украіны абараняць сябе павінна быць часткай любой дамовы», але канкрэтыка ў гэтым пытанні яшчэ не распрацаваная.
Таксама 18 красавіка прэс-сакратар Крамлю Дзмітрый Пяскоў заявіў падчас брыфінгу, што месяц мараторыю на ўдары па энергааб’ектах скончыўся.
«Месяц, насамрэч, скончыўся, але ў дадзены момант ніякіх іншых указанняў вярхоўнага галоўнакамандуючага, прэзідэнта Пуціна, не было», – адказаў Пяскоў на пытанне аб тым, ці адновяць бакі ўдары па энергетыцы.
Тым часама Украіна і ЗША 17 красавіка падпісалі мемарандум аб пагадненні наконт карысных выкапняў, які зацвярджае намер краінаў урэшце падпісаць угоду.
Марыя Міхалевіч belsat.eu
