Сейм Латвіі забараніў грамадзянам Беларусі і Расеі працаваць на аб’ектах крытычнай інфраструктуры без спецыяльнага дазволу ад нацыянальнага органу бяспекі. Забарона набудзе моц, калі яе падпіша прэзідэнт, а прэзідэнты ў Латвіі нячаста адмаўляюцца падпісваць ухваленыя Сеймам праекты.
Сейм Латвіі 12 чэрвеня прыняў у трэцім чытанні папраўкі да закону аб нацыянальнай бяспецы, якія прадугледжваюць забарону на працаўладкаванне і аказанне паслуг у крытычнай інфраструктуры для грамадзянаў Беларусі і Расеі, расказвае «Delfi».
Праект яшчэ мае ўхваліць прэзідэнт не раней за 10-ы дзень і не пазней за 21-ы дзень з ухвалення Сеймам. Згодна Канстытуцыі Латвіі, прэзідэнт не можа накласці вета, а можа толькі папрасіць паўторна разглядзець праект, прыпыніць апублікаванне закону на два месяцы і вынесці законапраект на рэферэндум. Такое здараецца рэдка.
Законапраект не цалкам забараняе працу грамадзянаў Беларусі і Расеі на аб’ектах крытычнай інфраструктуры. Грамадзяне Расеі і Беларусі змогуць выконваць працу ў крытычнай інфраструктуры пры наяўнасці асобнага дазволу нацыянальнага органу бяспекі.
Цяперашнія папраўкі прадугледжваюць, што грамадзяне Расеі і Беларусі не змогуць без спецыяльнага дазволу працаваць або аказваць паслугі на аб’ектах крытычнай інфраструктуры (або крытычнай інфраструктуры еўрапейскага ўзроўню), калі аказанне такіх паслуг прадугледжвае доступ да інфармацыі або тэхналагічнага абсталявання, неабходнага для функцыянавання крытычнай інфраструктуры. Таксама грамадзяне Беларусі і Расеі або юрыдычныя асобы, заснаваныя ў Беларусі і Расеі, не змогуць валодаць або быць бенефіцыярамі крытычнай інфраструктуры. Грамадзянам Беларусі і Расеі забараняецца займаць кіраўнічыя пасады ў такой інфраструктуры.
Паводле закону аб нацыянальнай бяспецы, крытычная інфраструктура ў Латвіі – гэта аб’екты, сістэмы або іх часткі, размешчаныя ў Латвіі, неабходныя для выканання важных грамадскіх функцыяў, а таксама для аховы здароўя, бяспекі, эканамічнага або сацыяльнага дабрабыту насельніцтва. Спіс такіх аб’ектаў закрыты.
Сейм Латвіі таксама разглядзеў у трэцім, але не апошнім чытанні законапраект аб забароне купляння нерухомасці ў Латвіі грамадзянам Беларусі і Расеі, а таксама беларускім і расейскім кампаніям і кампаніям, у якіх грамадзяне Беларусі і Расеі маюць не менш за 25 % статутнага капіталу. Выключэнне ў цяперашнім тэксце законапраекту робяць для тых, хто мае выдадзеныя да набыцця законам моцы статус сталага жыхара Еўразвязу ў Латвіі або сталы від на жыхарства ў Латвіі, пры ўмове, што гэта адзіны жыллёвы аб’ект грамадзяніна. Беларусы пісалі ў Сейм лісты з просьбай не прымаць такіх жорсткіх абмежаванняў: выключэнняў не зрабілі нават для ўцекачоў.
Алесь Наваборскі belsat.eu
