Грамадзянам Беларусі з прычыны атакі Ізраілю на Іран рэкамендавалі «ўлічваць сітуацыю, што склалася» і «ўзважваць неабходнасць паездак у краіны, якія ўваходзяць у зону канфлікту». Якія гэта краіны, не ўдакладнілі, але папярэджанне выдавала толькі амбасада ў Ізраілі.
Міністэрства замежных справаў Беларусі апублікавала заяву адносна атакі Ізраілю на Іран 13 чэрвеня.
Грамадзянам Беларусі настойліва параілі «ўлічваць актуальную сітуацыю, узважваць неабходнасць паездак у краіны, што ўваходзяць у зону канфлікту, пры планаванні такіх паездак сачыць за афіцыйнымі паведамленнямі авіяцыйных уладаў аб магчымым увядзенні абмежаванняў на выкарыстанне паветранай прасторы шэрагу дзяржаваў, а таксама аб прыпыненні працы аэрапортаў».
Грамадзянаў Беларусі, якія ўжо перабываюць у рэгіёне, заклікалі «строга выконваць захады бяспекі і кіравацца рэкамендацыямі ўладаў краіны перабывання».
Пра якія краіны вядзецца, не ўдакладняецца. Іран і Ізраіль не маюць агульнай мяжы, а калі між Ізраілем і Іранам распачнецца нешта большае за абмен авіяцыйнымі ўдарамі, уцягнутыя могуць быць і суседнія краіны, як Ірак, Сірыя, Ліван ці Емен, дзе дзейнічаюць праіранскія проксі-сілы.
На момант публікацыі адмысловыя рэкамендацыі беларусам давала толькі амбасада ў Ізраілі: яна папрасіла «не планаваць паездак у Дзяржаву Ізраіль да нармалізацыі сітуацыі», а грамадзянам Беларусі ў Ізраілі параіла «выконваць рэкамендацыі мясцовых уладаў і прытрымлівацца правілаў асабістай бяспекі, у тым ліку заставацца побач з бамбасховішчамі і ўстрымлівацца ад перамяшчэнняў».
Амбасада Беларусі ў Іране і іншыя беларускія амбасады ў рэгіёне падобных папярэджанняў не выдавалі.
Паляцець у Ізраіль ці вылецець адтуль на момант публікацыі немагчыма: паветраная прастора закрытая. Самалёт, што ляцеў з Менску ў Дубай, прызямляўся ў Баку і мае вылятаць са спазненнем; яшчэ адзін рэйс у Дубай быў скасаваны.
МЗС Беларусі «глыбока занепакоенае»
Ад імя Беларусі МЗС выказала «глыбокую занепакоенасць новым этапам ваеннай эскалацыі паміж Ізраілем і Іранам, а таксама паведамленнямі пра гібель мірных жыхароў, у тым ліку дзяцей».
,,«Сілавы сцэнар канфлікту стварае сур’ёзную пагрозу рэгіянальнай стабільнасці і бяспецы, нясе рызыку гуманітарнай катастрофы і можа мець непрадказальныя глабальныя наступствы, – піша МЗС Беларусі. – Заклікаем усе зацікаўленыя бакі да стрыманасці, адказнасці і недапушчэння дзеянняў, якія могуць негатыўна паўплываць на палітычна-дыпламатычныя намаганні міжнароднай супольнасці, скіраваныя на комплекснае ўрэгуляванне сітуацыі на Блізкім Усходзе».
У ноч на 13 чэрвеня Ізраіль нанёс серыю ўдараў па Іране: цэліліся ў ядравыя і вайсковыя аб’екты, а таксама ў вайсковае кіраўніцтва Ірану. Аперацыю тлумачылі тым, што Іран быў «як ніколі блізкі да атрымання ядравай зброі».
У выніку ўдараў былі забітыя кіраўнік Корпусу вартавых ісламскай рэвалюцыі генерал Хусэйн Салямі і камандуючы ўзброенымі сіламі Ірану генерал Голям Алі Рашыд, шэраг вайскоўцаў і навукоўцаў ядравай праграмы. Іран пацвердзіў, што быў пашкоджаны завод узбагачэння ўрану, падвышэння ўзроўню радыяцыі не назіралі. На кадрах з Ірану відаць, што ўдары трапілі ў тым ліку ў жылыя дамы ў сталіцы; іранскія медыі заяўлялі пра паўсотні пацярпелых, з якіх 35 – жанчыны і дзеці, і некалькіх загінулых мірных жыхароў. Гэтая аперацыя нагадвае нядаўнюю аперацыю «Павуціна» Службы бяспекі Украіны на тэрыторыі Расеі: ужывалася не толькі авіяцыя, але і дроны, таемна правезеныя на тэрыторыю Ірану.
Іран у адказ запусціў па Ізраілі сотню беспілотнікаў, але ўсе яны былі перахопленыя, пра пацярпелых і разбурэнні не паведамлялася. Пра запуск балістычных ракетаў з Ірану не казалі. Іран можа не абмежавацца ранішняй атакай дронамі: над мячэццю ў горадзе Кум узнялі сімвалічны сцяг кроўнай помсты.
Пасля іранскага ўдару ў адказ Ізраіль нанёс новыя ўдары па ядравым аб’екце ў Натанзе і аэрапорце ў Тэбрызе.
Алесь Наваборскі belsat.eu
