У Варшаве паліцыя затрымала 33-гадовага грамадзяніна Беларусі, які быў у міжнародным вышуку на падставе «чырвонай ноты» Інтэрполу на запыт уладаў Беларусі.
Затрыманне адбылося яшчэ 9 чэрвеня. Мужчыну даставілі ў Акруговую пракуратуру ў Варшаве для правядзення следчых дзеянняў.
Паводле польскіх праваахоўных органаў, грамадзянін Беларусі падазраецца ва ўдзеле ў арганізаванай злачыннай групоўцы, якая займалася гандлем наркотыкамі. У вышук яго падалі ўлады Беларусі. На радзіме затрыманаму пагражае да 20 гадоў пазбаўлення волі.
«Чырвоная нота» Інтэрполу азначае найвышэйшую ступень міжнароднага вышуку і інфармуе службы ўсіх краінаў, што той, каго шукаюць, ёсць небяспечным злачынцам. Вышук паводле «чырвонай ноты» вядзецца з мэтай арышту і экстрадыцыі.
Беларускія праваабаронцы неаднойчы звярталі ўвагу, што ўлады Беларусі могуць выкарыстоўваць Інтэрпол для вышуку палітычных апанентаў і ўдзельнікаў пратэстаў. Запыты ад Беларусі паводле выразна «палітычных» артыкулаў Інтэрпол адхіляе, аднак паводле эканамічных і іншых справаў цалкам могуць затрымаць.
Марыя Міхалевіч belsat.eu
