Поўнамаштабная вайна ва Украіне трывае 1141 дзень. Паводле ўкраінскага вайсковага камандавання, Расея фактычна распачала новы наступ на Сумскую і Харкаўскую вобласці. Кажуць, гэта не мяняе сітуацыі. «Белсат» пераказвае, што пішуць пра вайну і падзеі вакол яе.
Генеральны штаб Збройных сілаў Украіны ранкам 9 красавіка паведамляў, што за мінулы дзень налічылі 161 баявое сутыкненне. Інтэнсіўнасць баёў высокая, але не рэкордная, і ў апошнія тыдні два спадае. Найбольш баёў па-ранейшаму на пакроўскім напрамку, даволі шмат – на ліманскім і тарэцкім, а таксама ў Курскай вобласці Расеі. А 16-й гадзіне 9 красавіка Генштаб ЗСУ ведаў пра яшчэ 54 сутыкненні з пачатку дня.
Паводле ўкраінскіх падлікаў, Расея за мінулы дзень страціла 1270 чалавек забітымі або цяжка параненымі (каля 927,6 тысячы чалавек з пачатку поўнамаштабнай вайны), яшчэ 4 танкі, 10 баявых бронемашынаў, 52 артылерыйскія сістэмы, 1 сродак супрацьпаветранай абароны, 118 адзінак аўтамабільнай тэхнікі.
За мінулы дзень ЗСУ налічылі 91 авіяцыйны ўдар Расеі трыма ракетамі і 162 кіраванымі авіябомбамі, амаль 4900 абстрэлаў, з якіх 100 з рэактыўных сістэмаў залпавага агню, запуск 2180 дронаў-камікадзэ. За мінулую ноч Расея запусціла па Украіне 55 ударных беспілотнікаў тыпу іранскіх «Shahed» – збіць удалося 32, яшчэ 8 былі «лакацыйна страчаныя» без наступстваў. Ад расейскіх удараў 9 красавіка на Данеччыне былі забітыя як мінімум два мірныя жыхары, два былі параненыя; у Дняпры параненыя 15 чалавек, былі таксама пацярпелыя ў Харкаве.
Днём 9 красавіка расейскія войскі працягнулі атакаваць Украіну ў небе і на зямлі. Асабліва часта Паветраныя сілы Украіны папярэджвалі пра атакі на Сумскую, Харкаўскую, Данецкую і Запарожскую вобласці. Прэзідэнт Украіны Уладзімір Зяленскі ў сярэдзіне дня напісаў пра чарговую атаку Расеі: адзначыў, што білі прыцэльна па жылых раёнах, пашкодзілі звычайныя будынкі і цывільную інфраструктуру. Згадаў пра параненую расейскім ударам мінулым вечарам 11-гадовую дзяўчынку ў Краматорску.
,,«У Маскве ігнаруюць якую заўгодна дыпламатыю, бо лічаць, што могуць сабе гэта дазволіць», – заявіў Зяленскі і заклікаў партнёраў Украіны больш дапамагаць, каб ратаваць жыцці людзей, і ціснуць на Расею, каб удары спыніліся.
Расея і Злучаныя Штаты тым часам рыхтуюць на 10 чэрвеня новыя перамовы ў турэцкім Стамбуле, перадае «Європейська правда». Перамовы, паводле амерыканскага боку, будуць тычыцца не вайны ва Украіне, а нармалізацыі працы амбасадаў. Еўразвяз тым часам пералічыў Украіне 1 млрд еўра крэдыту, забяспечанага расейскімі канфіскаванымі актывамі.
Украіна, падобна, адбіваецца і на зямлі, і ў паветры. 9 красавіка расейскія чыноўнікі, у тым ліку Міністэрства абароны, распавялі пра атаку паўтарох сотняў дронаў на тузін рэгіёнаў Расеі. Паводле Telegram-каналу «Astra», пад атаку трапіў сярод іншага ваенны аэрадром у Маздоку, што ў Паўночнай Асеціі, які выкарыстоўваўся для паветраных атак на Украіну. Акрамя таго, украінскія вайскоўцы хваляцца наступам на тэрыторыю Расеі – 225-ы асобны штурмавы батальён 9 красавіка паказаў, як цяжкая тэхніка праходзіць праз «зубы дракона», як сцвярджаецца, у Белгародскай вобласці Расеі.
Раней Зяленскі заяўляў еўрапейскім лідарам, што Расея рыхтуе наступ на Запарожскую, Сумскую і Харкаўскую вобласці Украіны. Галоўнакамандуючы ЗСУ Аляксандр Сырскі ў інтэрв’ю Lb.ua заявіў, што наступ на Сумшчыну і Харкаўшчыну «фактычна ўжо распачаўся». Ён расказваў, што сітуацыя не змянілася кардынальна, але ўжо тыдзень назіраюцца павелічэнні колькасці наступальных дзеянняў амаль удвая на ўсіх асноўных напрамках. Сырскі адзначыў таксама, што трэба ўлічваць фактар будучых вучэнняў у Беларусі, якія Расея можа скарыстаць як прыкрыццё новага ўдару.
Прадстаўнік Генштабу ЗСУ Дмытро Лыховы пазней растлумачыў: расейскія войскі сапраўды актывізаваліся на поўначы Сумшчыны і Харкаўшчыне, але гаворка не пра прынцыповыя змены на фронце, сітуацыя застаецца стабільнай, а планы Расеі не навінка для Украіны. Тым не менш, атакі трываюць, а з памежных раёнаў Сумскай вобласці эвакуююць людзей, якія жылі пад штодзённымі расейскімі абстрэламі.
Амерыканскі Інстытут вывучэння вайны (ISW) адзначае ў штодзённай справаздачы, што расейскія войскі прасоўваюцца на шэрагу напрамкаў, у ліку якіх ліманскі, тарэцкі, пакроўскі і вяліканавасёлкаўскі, а ўкраінскія паралельна прасоўваюцца пад Пакроўскам.
На пакроўскі напрамак звяртаюць асаблівую ўвагу: расейскія войскі спрабуюць атачыць Пакроўск і ціснуць на Канстантынаўку, але губляюць сілы ў непаспяховых механізаваных і пяхотных атаках – украінскія сілы праводзяць паспяховыя аперацыі з дронамі і лакальныя контратакі. Расея, нагадвае ISW, ужо 13 месяцаў спрабуе ўзяць Пакроўск, страціла танкаў на пяць дывізіяў і тысячы чалавек. На думку ISW, гэта сведчыць аб негатовасці Расеі да перамоваў і жаданні захапіць Украіну, якой бы ні была цана.
ISW звяртае ўвагу на яшчэ адну змену, пра якую расказвалі ўкраінскае «Суспільне» і нямецкі «Bild»: Расея змяніла тактыку запуску «шагэдаў». Беспілотнікі сталі запускаць найшчыльнейшымі фармацыямі, каб уразіць цэлі адначасова, тады як раней запускалі шырокімі фармацыямі, каб дроны было цяжэй перахапіць. Са статыстыкі, якую публікуе Генштаб ЗСУ, выглядае, што тактыка дае некаторыя поспехі: Расея запускае ўтрая менш дронаў, а па цэлях трапляе ўдвая менш.
Алесь Наваборскі belsat.eu
