Дзмітрый Сасноўскі, які ўтрымліваецца за кратамі нібыта за напад на прапагандыста Грыгорыя Азаронка, адмовіўся браць у рукі пісталет. Тады замест яго сцэну разыграў супрацоўнік спецслужбаў Аляксей Лабееў, які пазней сустракаўся са зніклай спікеркай Каардынацыйнай рады Анжалікай Мельнікавай, паведамляе «BYPOL».
Паводле інфармацыі крыніцаў «BYPOL», падчас зрэжысіраванага нападу на прапагандыста Грыгорыя Азаронка палітвязень Дзмітрый Сасноўскі адмовіўся браць у рукі пісталет і страляць у Азаронка.
,,«Ён ужо тады зразумеў, што гэта правакацыя і ён будзе ліквідаваны агнём у адказ, тады з пісталетам на Азаронка напаў сам укаранёны супрацоўнік КДБ Аляксей Лабееў.
Дзмітрый Сасноўскі пры гэтым проста стаяў побач. Нягледзячы на гэта тэрмін атрымаў не нападнік Лабееў, а Сасноўскі. Сасноўскі ў пакаранне за адмову нападаць на Азаронка быў збіты аператыўнікамі КДБ, якія яго затрымалі. Пасля затрымання чальцоў АГСБ [Атрадаў грамадзянскай самаабароны Беларусі. – Заўв. рэд] супрацоўнікі КДБ выдалілі тэлеграм-чат АГСБ, што зрабіць мог толькі яго стваральнік», – распавядае «BYPOL».
Арганізацыя «Атрады грамадзянскай самаабароны Беларусі» прызнаная ў Беларусі тэрарыстычнай. У справе АГСП быў асуджаны ў тым ліку Дзмітрый Сасноўскі, якога пакаралі 20 гадамі калоніі ўзмоцненага рэжыму.
Чальцоў АГСБ абвінавацілі ў спробе падрыву вузла сувязі Вайскова-марскога флоту Расеі ў Вялейцы, замаху на прапагандыста Грыгорыя Азаронка і спробе знішчыць лесанарыхтоўчую тэхніку ў лясгасах. Ува ўсіх выпадках прысутнічалі падстаўныя саўдзельнікі-сілавікі, якія, верагодна, і былі арганізатарамі інцыдэнтаў, у якіх абвінавацілі іншых.
Аляксей Лабееў – супрацоўнік спецслужбаў Беларусі, які, як высветлілі журналісты «Polityka» і «The Insider», меў рамантычную сувязь з Анжалікай Мельнікавай, на знікненне якой звярнулі ўвагу ў канцы сакавіка 2025 года. Раней кіраўнік «BYPOL» Аляксандр Азараў распавёў, што менавіта Лабееў удзельнічаў у нападзе на Азаронка.
Арсен Рудэнка belsat.eu
