Вайсковых манеўраў усё больш. У верасні ў нашай краіне пройдуць адразу некалькі вайсковых вучэнняў. Гэта ўжо нашумелыя «Захад-2025», а таксама цесна з імі звязаныя «Узаемадзеянне-2025», «Пошук-2025» і «Эшалон-2025». Пра буйныя вучэнні ў адказ на актыўнасць беларускіх ды расейскіх вайскоўцаў заявілі і краіны – удзельніцы блоку НАТО. Пры гэтым усе гавораць пра ўласныя выключна мірныя намеры.
«Мы, беларусы – мірныя людзі!» – гэта не толькі першы радок цяперашняга афіцыйнага гімну нашае краіны, але і, лічы, афіцыйная заява, з якою выступіла Міністэрства абароны рэжыму Лукашэнкі. Сёння кіраўнік ведамства генерал-лейтэнант Віктар Хрэнін паведаміў пра перанос вучэнняў «Захад-2025» ад заходніх межаў углыб Беларусі дзеля зніжэння напружанасці ў рэгіёне, а таксама дзеля пацверджання гатовасці афіцыйнага Менску да дыялогу і кампрамісаў.
Апроч перадыслакацыі, плануюць таксама зменшыць колькасць войскаў, што будуць удзельнічаць у вучэннях, практычна ўдвая.
,,«Беларусь праінфармуе ўсе дзяржавы пра захады, што будуць праводзіцца, і іх параметры. Пры тым мы таксама маем намер арганізаваць назіранне за гэтымі вучэннямі, каб усе маглі пабачыць, што адбываецца і што вучэнні сапраўды носяць абарончы характар», – заявіў памочнік міністра абароны ў пытаннях міжнароднай вайсковай супрацы Валерый Равенка.
Наколькі можна верыць міралюбным запэўніванням тых, хто за два дні да нападу расейцаў на Украіну з тэрыторыі Беларусі ў лютым 2022-га даваў украінскім вайскоўцам слова афіцэра, што нападу не будзе – пытанне рытарычнае, упэўнены прадстаўнік Аб’яднанага пераходнага кабінету ў абароне і нацыянальнай бяспецы.
«Я пакуль што, з вайсковага пункту гледжання, не бачу прычынаў, каб, умоўна, расслабляцца нашым заходнім і паўднёвым суседзям. Бо мы бачым, што вайсковая прысутнасць нарошчваецца», – кажа Вадзім Кабанчук.
Дый нашая краіна – не такая ўжо і вялікая, каб адсунуць войскі на адлегласць, большую за адзін марш-кідок, дадае Кабанчук. Дык можа, тады гэтаму «жэсту міралюбнасці» ад Хрэніна варта шукаць найперш не вайсковае, а палітычнае тлумачэнне?
,,«Лукашэнка, зразумела, мае на ўвазе і робіць некаторыя асцярожныя крокі, каб, з аднаго боку, не раззлаваць Маскву, а з іншага боку – усё-ткі паслаць нейкія пасы Захаду, што, маўляў, мы вам не спрадвечны вораг і мы хацелі б палепшыць адносіны», – тлумачыць палітычны аглядальнік радыё «Свабода» Юры Дракахруст.
Але ці ёсць давер да гэтых пасаў? Падначаленыя Лукашэнку вайскоўцы скардзяцца, што ані Польшча, ані іншыя краіны НАТО на запрашэнні афіцыйнага Менску паназіраць за вучэннямі «Захад-2025» не адгукаюцца. І нават абвясцілі намер зладзіць у адказ уласныя манеўры.
«Што да заявы міністра нацыянальнай абароны Польшчы пра гэтак званыя буйныя вучэнні дывізійнага маштабу – іншага мы не чакалі. Ну і каб неяк адрэагаваць, мы пастанавілі правесці невялікае ротна-тактычнае вучэнне ў Гарадзенскім раёне, непадалёк ад мяжы з Польшчай», – падкрэсліў памочнік міністра абароны Равенка.
То бок на сёння напружанне ў рэгіёне аніяк не зніжаецца. Ці дойдзе, у выніку, да яшчэ аднаго ваеннага канфлікту – ці то з паўднёвымі, ці то з заходнімі суседзямі – пакажуць канкрэтныя чыннікі, тлумачыць Кабанчук.
«Гэта канцэнтрацыя ўдарнай групоўкі, канцэнтрацыя войскаў і вайсковай тэхнікі. Калі мы бяром пагрозу для Украіны, гэта мусяць быць дзясяткі тысяч вайскоўцаў – ну, скажам, групоўка каля трыццаці і болей тысячаў. Калі мы бяром краіны Балтыі, гэта можа быць адносна невялікая групоўка», – упэўнены палітык і былы вайсковец.
І як трывожны званочак, дадае эксперт, можна расцэньваць апошняе выказванне прэзідэнта ЗША Доналда Трампа пра тое, што Пуцін звар’яцеў.
Валера Руселік, «Белсат»
