У мігрантак, якія нарадзілі ў беларускіх шпіталях, адбіраюць дзяцей, пакуль яны не аплацяць рахункаў за медычныя паслугі. Пра гэта паведамляе партал Oko.press са спасылкаю на польскіх актывістаў, якія збіраюць грошы на дапамогу жанчынам, якія апынуліся ў падобнай сітуацыі.
Паведамляецца, што адна з жанчын, якая сутыкнулася з падобнай праблемай у Беларусі, – маці-адзіночка Э. з Конга, якая нарадзіла ў Беларусі ў красавіку. У жанчыны была пратэрмінаваная віза, таму яе ўвогуле не хацелі прымаць у шпіталь, а праз тры дні пасля родаў пачалі пагражаць, што выклічуць міліцыю, калі яна не заплаціць шпіталю каля тысячы долараў.
У публікацыі адзначаецца, што пагасіць доўг удалося з дапамогай польскай арганізацыі «Hope and Humanity», якая арганізавала збор сродкаў. Пасля аплаты жанчыне аддалі дзіця.
Паводле сцвярджэнняў актывістаў, калі жанчыны не могуць аплаціць рахункаў адразу, то ім не дазваляюць кантактаваць з дзіцем. У такой сітуацыі апынулася іншая сям'я з Конга, чыё дзіця таксама нарадзілася ў Беларусі.
,,«Хлопчык правёў цэлы дзень без мамы, бо бацькам не хапіла часткі сумы для аплаты бальнічных рахункаў», – перадае словы актывісткі «Hope and Humanity» Малгажаты Рыхарскай Oko.press.
Калі актывісты дапамаглі выплаціць запазычанасць, дзіця вярнулі, але бацьку затрымала міліцыя, а сям'ю ўлады Беларусі хочуць дэпартаваць у Конга.
Паведамляецца пра М. з Гвінеі, якая атрымала рахунак на суму каля $ 32,3 тысячы. У лістападзе 2024 года яна пайшла ў беларускі шпіталь на 23–24-м тыдні цяжарнасці. У М. таксама былі праблемы ў звязку з пратэрмінаванай візай, але яе ўсё ж шпіталізавалі і зрабілі кесарава сячэнне.
Дзяўчынка, якая нарадзілася раней за тэрмін, важыла ўсяго 600 грамаў, таму ёй спатрэбілася дапамога. Сцвярджаецца, што ёй займаліся спецыялісты РНПЦ «Маці і дзіця» і 3-га дзіцячага шпіталю Менску. У сакавіку немаўля важыла 3,3 кілаграма. Аднак працаўнікі шпіталю не пускалі маці да дзяўчынкі да пагашэння вялізнага рахунку, а ў статусе ўцекача жанчыне адмовілі.
,,«[Жанчына] нам напісала, што дырэктарка шпіталю сказала ёй, каб яна больш там не з'яўлялася, пакуль не аплаціць рахунку. Дзяўчына ў поўнай роспачы. Яе ўжо спрабавалі ўгаварыць адмовіцца ад дзіцяці», – распавяла Зося Краснавольска з «Hope and Humanity», якая падтрымлівае сувязь з М.
Сцвярджаецца, што прадстаўнікі UNICEF прапанавалі жанчыне адмовіцца ад дзіцяці і зноў паспрабаваць атрымаць прытулак у Беларусі або быць дэпартаванай разам з дачкой.
За месяц маладой маці дазволілі пабачыцца з дзіцем толькі адзін раз.
Актывісты паведамляюць і пра іншыя падобныя выпадкі.
Арсен Рудэнка belsat.eu
