Уладзімір Пуцін фактычна высунуў новую ўмову для мірных перамоваў: вонкавае кіраванне Украінаю з тым, каб зладзіць там выбары і сфармаваць «дзеяздольны ўрад». Украінскі палітолаг Уладзімір Фясенка ў эфіры «Вот Так» назваў гэта прапагандысцкай заяваю і імкненнем зацягнуць мірныя перамовы.
У Маскве яшчэ летась зачапіліся за перанос прэзідэнцкіх выбараў ва Украіне, што меліся адбыцца ў сакавіку 2024 года, аднак не былі прызначаныя з увагі на ваенны стан, уведзены ад пачатку поўнамаштабнай вайны. Уладзімір Пуцін казаў, што легітымнасць Уладзіміра Зяленскага скончылася, таму, маўляў, незразумела, з кім весці перамовы.
Аднак 18 лютага спікер Крамля Дзмітрый Пяскоў заяўляў, што Уладзімір Пуцін «пры неабходнасці будзе гатовы весці перамовы» з Уладзімірам Зяленскім, аднак «з улікам рэальнасці, што кажа пра магчымасць аспрэчваць легітымнасць самога Зяленскага».
Цяпер жа, падобна, пазіцыя Масквы зноў змянілася. Пуцін прапанаваў увесці ва Украіне вонкавае кіраванне «пад эгідаю ААН з ЗША, еўрапейскімі краінамі, а таксама нашымі партнёрамі і сябрамі». Гэта патрэбна, каб «зладзіць дэмакратычныя выбары, каб прывесці да ўлады дзеяздольны ўрад, якому давярае народ, і потым ужо з імі пачынаць перамовы наконт мірнай дамовы».
Менавіта з такім урадам, як заявіў Пуцін, можна будзе падпісваць «легітымныя дакументы, што будуць прызнаныя ва ўсім свеце і будуць надзейнымі».
«Гэта толькі прапагандысцкая заява», – так ідэю расейскага палітыка ў эфіры «Вот Так» пракаментаваў украінскі палітолаг Уладзімір Фясенка. Ён адзначыў, што нібыта нелегітымнасць улады ў Кіеве не перашкаджала нядаўнім перамовам у Саудаўскай Аравіі, дый наагул пуцінская прапанова не спадабаецца Злучаным Штатам:
,,«Фактычна гэта будзе адмова ад усіх папярэдніх дамоваў з ЗША найперш. Наўрад ці гэта спадабаецца Доналду Трампу, бо тое, што прапаноўвае Пуцін, катэгарычна і кардынальна змяняе логіку перамоўнага працэсу і зацягвае яго на нявызначаны час».
Аналітык упэўнены, што ідэю з вонкавым кіраваннем немагчыма будзе рэалізаваць, нават калі яна спадабаецца Вашынгтону, бо на гэта не пагодзяцца ўкраінцы:
«Мы не прымем гэтую логіку, а без Украіны рэалізаваць гэтую ідэю будзе немагчыма. Яе не прымуць нашыя еўрапейскія партнёры. Любыя прапановы, ад каго б яны ні былі, ад Расеі ці нават ЗША, якія не будзе прымаць украінскі бок, не будуць рэалізаваныя. Варта гэтую простую думку разумець. Таму Пуцін можа прапанаваць і заяўляць што заўгодна».
Фясенка таксама не выключыў асабістай сустрэчы Зяленскага з Пуціным, аднак пакуль не бачыць у ёй патрэбы. Да мірнай перамовы яшчэ далёка, а вось пагадненне аб спыненні агню могуць падпісаць і вайскоўцы.
«Калі ідзецца, напрыклад, пра поўнае спыненне агню – тое, чаго дамагаецца амерыканскі бок, – то для гэта не патрэбна сустракацца Зяленскаму і Пуціну. Падпісваецца такое пагадненне, як паказвае досвед, альбо вайскоўцы, альбо ўпаўнаважаныя прадстаўнікі дзяржавы. Такое пагадненне ўзгадняюць іншыя асобы. Гэта не палітычная дамова, гэта не мірная дамова. Таму на гэты момант я не бачу сэнсу і аніякай практычнай прававой патрэбы ў асабістай сустрэчы Зяленскага і Пуціна», – падсумаваў палітолаг.
Сцяпан Кубік belsat.eu
