1 чэрвеня Служба бяспекі Украіны паведаміла пра аперацыю «Павуціна» ў справе знішчэння расейскай стратэгічнай авіяцыі. «Белсат» спытаў у беларускага вайсковага эксперта, ці адаб'ецца гэта на пастаўках з РФ у нашую краіну знішчальнікаў і бамбавікоў ды якія высновы зрабілі ў Менску пасля поспеху ўкраінскай атакі.
«З цяжкавіка дроны вылятаюць», – казалі відавочцы, якія здымалі на відэа тое, што аказалася аперацыяй «Павуціна» ў выкананні Службы бяспекі Украіны. Беспілотнікі прывезлі фурамі бліжэй да чатырох авіябазаў, і дроны атакавалі вайсковыя самалёты. Цэлямі былі пяць аэрадромаў, да аднаго, у Амурскай вобласці, цяжкавік не даехаў, загарэўся на шляху.
У СБУ сцвярджаюць, што пацэлілі ў 41 самалёт, гэта 34 % стратэгічных носьбітаў крылатых ракетаў на галоўных аэрадромах Расеі.
Пры гэтым вайсковы аналітык Ян Мацвееў у эфіры «Вот Так» казаў, што, паводле спадарожнікавых звестак і відэа з дронаў, былі знішчаныя або пашкоджаныя як мінімум 12 бамбавікоў Ту-95 і Ту-22 ды адзін транспартавы самалёт Ан-12.
Генштаб ЗСУ ў справаздачу наконт стратаў супраціўніка дадаў 12 самалётаў. Апошні раз гэтая статыстыка абнаўлялася 4 траўня.
«Аказалася, што аэрадромы стратэгічнай авіяцыі Расеі не прыкрытыя сродкамі радыёэлектроннай барацьбы. Нібыта і ў тыле, аднак аказалася, што адлегласць сёння не ратуе», – кажа «Белсату» на ўмовах ананімнасці беларускі вайсковы эксперт.
Ён упэўнены, што ў нашай краіне пасля паспяховай аперацыі СБУ ў Расеі ўзмоцняць ахову авіяцыі:
,,«Думаю, будуць зробленыя пэўныя высновы і будзе ўзмоцненая радыёэлектронная ахова. Будуць узмоцненыя капаніры, што ў нас маюцца для авіяцыі, бо беспілотнікі невялікія, як той кажа, могуць залятаць у фортку, вентыляцыйныя адтуліны. Думаю, будуць перагледжаныя нормы аховы самалётаў».
Акрамя таго, паводле аналітыка, да авіябазаў падцягнуць больш ракетных і ракетна-гарматных комплексаў, каб «збіваць дроны на кароткай адлегласці». Яшчэ адна захада – сродкі выяўлення:
«Мы маем радары „Раса-РБ“, што дазваляюць выяўляць малыя цэлі, якія нізка ляцяць, і перадаваць адпаведную інфармацыю сродкам СПА».
Эксперт пры гэтым падкрэсліў, што поспех аперацыі «Павуціна» не паўплывае на пастаўкі вайсковых самалётаў з Расеі ў Беларусь. Акурат тыдзень таму Мінабароны нашай краіны паведаміла аб прыбыцці партыі знішчальнікаў Су-30СМ2, а камандуючы паветранымі сіламі і войскамі паветранай абароны Андрэй Лук'яновіч анансаваў, што «сёлета мы яшчэ атрымаем партыю» такіх жа самалётаў.
Як зазначыў суразмоўца «Белсату», украінцы атакавалі ў Расеі адзінкі старой савецкай вытворчасці, што ўжо не вырабляюцца. А знішчальнікі-бамбавікі Су-30СМ2, якія пастаўляюць у Беларусь, – новыя і ўсцяж выпускаюцца.
«Прычым гэтае пераўзбраенне планавалася некалькі гадоў таму, гэта не тэрміновыя пастаўкі, трываюць паводле плану. Агулам Расея не жадае парушаць сваіх абавязкаў перад Беларуссю, яна зацікаўленая ў Беларусі, таму яны працягваюць пастаўкі, нягледзячы на тое, што самыя маюць вялікую патрэбу ў такіх самалётах», – кажа адмысловец.
Адзінае, што можа парушыць гэтую «ідылію», – імклівая страта самалётаў у вайне супраць Украіны:
,,«Тады, вядома ж, Расея будзе перадусім папаўняць свае патрэбы. Аднак пакуль няма інфармацыі, што гэтыя самалёты падаюць з неба ў вялікай колькасці. Таму Расея можа пастаўляць і ў сваё войска, і Беларусі».
Сцяпан Кубік belsat.eu
