Зяленскі адмаўляецца ад тэрытарыяльных саступак Расеі і кажа, што не мае ілюзіяў адносна выканання Расеяй патэнцыйных дамоваў аб замірэнні.
Прэзідэнт Украіны Уладзімір Зяленскі правёў прэс-канферэнцыю на наступны дзень пасля перамоваў са Злучанымі Штатамі ў Саудаўскай Аравіі, на якіх Украіна пагадзілася спыніць агонь на 30 дзён, калі тое ж зробіць Расея. Ён патлумачыў, што «не мае ілюзіяў» адносна выканання Расеяй дамоўленасцяў, але на прыпыненне агню пагадзіліся, каб не падыгрываць заявам пра «нежаданне міру», перадае «Європейська правда».
«Я неаднаразова падкрэсліваў: ніхто з нас не верыць расейцам – мы гэта праходзілі. Але з наратывам, што мы не хочам заканчэння вайны, які Расея вядзе і распаўсюджвае па ўсім свеце, гуляцца мы не будзем, – казаў Зяленскі. – Я настроены вельмі сур'ёзна, і для мяне гэта важна – спыніць вайну. Я хачу, каб прэзідэнт ЗША гэта бачыў, каб амерыканцы гэта бачылі і адчувалі. І каб Еўропа і ўсе былі адзіныя ў саюзе адносна таго, што трэба зрабіць усё, каб прымусіць Расею спыніць гэтую вайну».
На пытанне, калі можа распачацца 30-дзённае спыненне агню, Зяленскі адказаў: гэта залежыць ад Расеі. Калі Расея адмовіцца, то Зяленскі чакае ад Злучаных Штатаў «моцных крокаў» – кажа, можна разлічваць на «санкцыйныя дзеянні і ўзмацненне Украіны». Калі ж спыненне агню будзе дасягнутае, то, са словаў Зяленскага, 30 дзён будуць выкарыстаныя ў тым ліку на тое, каб «пакласці на паперу» ўзгодненыя крокі і фарматы гарантыяў бяспекі.
Зяленскі таксама заявіў, што не будзе пагаджацца на прызнанне расейскімі акупаваных тэрыторыяў – на неабходнасць такой саступкі раней неаднаразова намякалі Злучаныя Штаты. Ягоныя словы перадае «Українська правда»:
«Што да чырвоных лініяў, то я як прэзідэнт і ўкраінцы як грамадзяне нашай краіны не будзем парушаць нашую Канстытуцыю, а будзем абараняць наш суверэнітэт і незалежнасць, абараняючы наш народ і нашу зямлю».
,,«Нам вельмі няпроста супраць такога ворага біцца, але мы ваюем за сваю незалежнасць, таму прызнаваць прызнаваць якія заўгодна акупаваныя Расейскай Федэрацыяй тэрыторый мы не будзем. Гэта факт».
«Нашыя людзі змагаліся за гэта, нашыя героі гінулі, колькі параненых, колькі ўсяго сталася... Таму ніхто пра гэта забываць не будзе. Калі я гэта кажу – гэта найгалоўнейшая чырвоная лінія. Мы нікому не дазволім забыць гэтае злачынства супраць Украіны».
У Штатах таксама неаднаразова намякалі, што хацелі б адстаўкі Зяленскага і новых выбараў ва Украіне: прэзідэнт ЗША Доналд Трамп нават следам за расейскай прапагандай называў Зяленскага «дыктатарам» і сцвярджаў, што рэйтынг Зяленскага нібыта складае 4 % (насамрэч, рэйтынг расце: Зяленскаму на той момант давяралі 57 %, цяпер давярае 68 % украінцаў).
Зяленскі паслядоўна адмаўляўся праводзіць выбары падчас ваеннага стану, пра тое ж казалі ў апазіцыі. На прэс-канферэнцыі Зяленскі паўтарыў: «Пасля заканчэння вайны будзе знятае ваеннае становішча. І пасля зняцця ваеннага становішча выбары пройдуць паводле ўкраінскага заканадаўства».
Таксама Зяленскі пацвердзіў, што Украіна гатовая падпісаць рамкавую ўгоду з ЗША пра рэдказямельныя металы. Паводле яго «няма пра што казаць, ніякіх сакрэтаў за кадрам няма, мы гатовыя». Афіцыйна пра дэталі прапанаванай угоды не паведамлялі – у медыях «неафіцыйна» публікавалі тэкст магчымай угоды. Але тое было да сваркі Трампа з Зяленскім – цяпер угода можа змяніцца.
Пасля той сваркі ЗША прыпынялі ваенную дапамогу Украіне і перасталі дзяліцца з ёй звесткамі выведкі. Дапамогу аднавілі 11 сакавіка пасля амерыканска-ўкраінскіх перамоваў у Саудаўскай Аравіі. За час, пакуль дапамогі не было, фронт не абваліўся, а Украіна нават ішла ў контратакі. Але расейскія войскі прасунуліся ў Курскай вобласці, дзе Украіна раней захапіла горад Суджу і ваколіцы. Яшчэ 8 сакавіка расейскія войскі прарваліся ў Суджу. 12 сакавіка расейскія медыі публікавалі відэа з расейскімі вайскоўцамі ў цэнтры Суджы, ды Украіна сцвярджае, што не выводзіць войскі з гораду і вобласці.
Зяленскі ж заявіў на прэс-канферэнцыі:
«Нашыя войскі на тэрыторыі Курскай вобласці выконваюць свае заданні. Расейцы намагаюцца, адназначна, максімальна ціснуць на нашыя войскі. Вайсковае камандаванне робіць тое, што павінна рабіць: зберагае максімум жыццяў нашых ваяроў».
У Расеі на момант публікацыі не каментавалі прапановы спынення агню. Дзмітрый Пяскоў, прэс-сэкратар Уладзіміра Пуціна, заклікаў «не забягаць наперад», бо нібыта чакаюць дэталёвай інфармацыі пра прапановы. Зяленскі ж лічыць, што перамовы «разбілі планы Расеі што да поўнай эскалацыі адносінаў між Украінай і Амерыкай». На ягоную думку, ідзе дээскалацыя, як і мусіць быць між партнёрамі.
Алесь Наваборскі belsat.eu
