Намеснік прэм’ер-міністра Ігар Петрышэнка заявіў, што ў Беларусі скарэктуюць закон «Аб правах дзіцяці».
Віцэ-прэм’ер Ігар Петрышэнка падкрэсліў, што апошнія змены ў закон «Аб правах дзіцяці» былі ўнесены яшчэ ў 2016 годзе і цяпер дакумент патрабуе абнаўлення.
«Зʼяўляюцца ўкіды, выклікі, якія ў першую чаргу звязаны з прапагандай нетрадыцыйных зносінаў, з цацкамі, якія ўплываюць негатыўна на дзяцей, злачыннымі замахамі на дзяцей. Створана адпаведная група, якая падрыхтавала пэўныя змяненні», – цытуе намесніка прэм’ер-міністра БелТА.
Петрышэнка паабяцаў, што ў верасні гэты дакумент унясуць ва ўрад, а ў снежні – на разгляд Палаты прадстаўнікоў.
«Мы грунтоўна ў рамках і нацыянальнай камісіі, і профільных міністэрстваў прааналізуем і падрыхтуем адпаведныя карэктаванні, якія яшчэ больш абароняць нашых дзяцей у цяперашніх умовах, зрэагуем на выклікі звонку», – сказаў віцэ-прэмʼер.
Якія канкрэтна змены плануецца ўнесці ў закон, Петрышэнка не ўдакладніў.
Глеб Нержын belsat.eu