З 1 ліпеня ў Літве ўзмацняецца жорсткасць парадку прыёму на працу замежнікаў. Ахвотныя прыехаць сюды на працу мусяць атрымаць выдадзены ў Літве часовы від на жыхарства. Пра гэта паведамляе «Delfi».
Раней у Літве маглі працаваць замежнікі, якія прыязджалі ў Літву паводле бязвізавага рэжыму, нацыянальных і шэнгенскіх візаў або відаў на жыхарства, выдадзеных іншымі краінамі.
Новыя патрабаванні пра абавязковы ВНЖ не будуць распаўсюджвацца на замежнікаў, якія прыязджаюць у Літву ў камандзіроўку або ў якасці супрацоўнікаў кампаніі, заснаванай у дзяржаве – чальцы Еўрапейскага Звязу ці Еўрапейскай асацыяцыі вольнага гандлю.
Від на жыхарства таксама не спатрэбіцца:
- чальцам экіпажаў караблёў, якія плаваюць па міжнародных маршрутах пад сцягам Літвы;
- замежнікам, якія прыбываюць не больш як на тры месяцы ў годзе для развязання пытанняў, звязаных з заключэннем і выкананнем дамоваў, навучаннем персаналу або ўстаноўкай абсталявання;
- прадпрымальнікам, якія ёсць акцыянерамі і кіраўнікамі кампаніяў;
- высокапрафесійным спартоўцам;
- выканаўцам;
- журналістам, акрэдытаваным Міністэрствам замежных справаў;
- асобам, якія афіцыйна займаюцца рэлігійнаю дзейнасцю;
- замежнікам, якія прыбываюць для рэалізацыі валанцёрскіх праграмаў урадаў або ЕЗ;
- выкладнікам і даследнікам;
- грамадзянам эканамічна развітых краінаў, якія прыязджаюць на працу або займацца іншаю легальнаю дзейнасцю.
Замежнікі, якія пачалі працаваць у Літве да набыцця моцы зменамі, змогуць працаваць да заканчэння тэрміну легальнага перабывання або да таго часу, пакуль яны не набудуць права на працу на іншых падставах, прадугледжаных законам.
У Літве з 1 ліпеня таксама змяніўся парадак рэгістрацыі замежных турыстаў. З гэтага моманту ўсе госці краіны павінны будуць рэгістравацца ў Нацыянальнай турыстычнай інфармацыйнай сістэме.
Якуб Хруст belsat.eu
