Амбасадары краінаў Еўрапейскага Звязу ўзгаднілі новы, 17-ы пакет санкцыяў супраць Расеі. Яго ўхваленне адбылося на тле ўзмацнення ціску еўрапейскіх лідараў на расейскага лідара Уладзіміра Пуціна, каб ён сеў за стол перамоваў і паклаў канец вайне на Украіне, якую ён пачаў у лютым 2022 года.
«Мы яшчэ больш абмяжоўваем доступ да тэхналогіяў для бою. І мы ўнеслі ў спіс яшчэ 189 караблёў ценявога флоту, каб адрасаваць расейскі энергетычны экспарт. Гэтая вайна павінна скончыцца. Мы будзем працягваць моцна ціснуць на Крэмль», – заявіла ў X прэзідэнтка Еўракамісіі Урзуля фон дэр Ляен.
Як адзначае «Politico», чакаецца, што міністры абароны і замежных справаў дадуць сваё канчатковае ўхваленне 20 траўня.
Новы пакет санкцыяў, апроч амаль 200 караблёў ценявога флоту РФ, таксама забароніць еўрапейскім кампаніям весці бізнес з прыкладна 30 суб'ектамі, якія дапамагаюць абыходзіць санкцыі праз трэція краіны. А 75 асобаў і кампаніяў былі ўключаныя ў спіс за іх удзел у вайне.
На дадатак, ЕЗ пашырае свае прававыя магчымасці супраць суднаў, якія знішчаюць падводную інфраструктуру, прапагандысцкіх каналаў і фінансавых сродкаў падтрымання вайны.
Апроч таго, Еўразвяз пагадзіўся ўвесці санкцыі ў дачыненні суддзяў і пракурораў, якія маюць дачыненне да справаў Уладзіміра Кара-Мурзы і Аляксея Навальнага, ды забараніць экспарт хімікатаў, што выкарыстоўваюцца ў вытворчасці ракетаў, паведамілі дыпламатычныя крыніцы «Reuters».
Міністр замежных справаў Францыі Жан-Наэль Баро заявіў, што ўздзеянне санкцыяў пакуль недастатковае і Еўразвязу неабходна працаваць са Злучанымі Штатамі, дзе Кангрэс падрыхтаваў зруйнавальныя захады на выпадак, калі прэзідэнт ЗША Доналд Трамп захоча націснуць на Маскву.
,,«Нам трэба будзе пайсці далей, бо санкцыі пакуль не пераканалі Уладзіміра Пуціна ў неабходнасці спыніць агрэсіўную вайну. Таму мы павінны падрыхтавацца да пашырэння разбуральных санкцыяў, што могуць раз і назаўжды задушыць эканоміку Расеі», – сказаў ён, перадае «Reuters».
Адзін з еўрапейскіх дыпламатаў сказаў «Politico», што ў запасе яшчэ «шмат ідэяў з папярэдніх раўндаў», у тым ліку ў дачыненні энергетычнага сектару РФ, але іх увядзенне ўскладняецца пазіцыяй Вугоршчыны. Паралельна з гэтым ЕЗ таксама працуе над прапановамі для спыненні імпарту выкапнёвага паліва з Расеі ў рамках дарожнай мапы «RePowerEU». Чакаецца, што да чэрвеня ў яе межах будуць прынятыя новыя законы.
Нагадаем, што лідары Францыі, Украіны, Нямеччыны, Польшчы і Вялікай Брытаніі прапанавалі поўнае спыненне агню з 10 траўня, паабяцаўшы ўвесці новыя санкцыі супраць Расеі, калі яна на гэта не пагодзіцца. Аднак Уладзімір Пуцін адмовіўся ад гэтага і прапанаваў перамовы ў Турцыі 15 траўня.
Прэзідэнт Турцыі Рэджэп Эрдаган заявіў, што ягоная краіна гатовая стацца пляцоўкаю для мірных перамоваў паміж Расеяй і Украінай. А прэзідэнт ЗША Доналд Трамп запатрабаваў, каб Кіеў неадкладна пагадзіўся на перамовы з Расеяй нават без замірэння.
Прэзідэнт Украіны Уладзімір Зяленскі адказаў на гэта, што першы крок да рэальнага заканчэння вайны – гэта спыненне агню. Аднак на перамовы ў Стамбуле пагадзіўся, выклікаўшы на іх самога Пуціна. Той жа свайго ўдзелу не пацвердзіў.
Якуб Хруст belsat.eu
