Прэзідэнт ЗША заявіў, што Кіеў мусіць неадкладна пагадзіцца на перамовы з Расеяй нават без замірэння. Украінскі лідар Уладзімір Зяленскі раней выставіў умову: спачатку спыненне агню, а ўжо потым можна размаўляць.
«Пуцін не хоча заключаць пагаднення аб спыненні агню з Украінаю, а хоча сустрэцца ў чацвер у Турцыі, каб дамовіцца пра магчымае спыненне крывавай бойні. Украіна мусіць пагадзіцца на гэта, НЕАДКЛАДНА», – напісаў Доналд Трамп у сацыяльнай сетцы Truth Social, у сваёй манеры ўжываючы высокі рэгістр.
Паводле прэзідэнта Злучаных Штатаў, сустрэча ў Стамбуле пакажа, ці магчымая ўгода паміж Кіевам і Масквою, а «еўрапейскія лідары і ЗША будуць ведаць, на чым усё трымаецца, і здолеюць дзеяць адпаведна».
«Я пачынаю сумнявацца, што Украіна пойдзе на ўгоду з Пуціным, які занадта заняты святкаваннем перамогі ў Другой сусветнай вайне. СУСТРАКАЙЦЕСЯ ЗАРАЗ ЖА», – запатрабаваў Трамп.
На саміце ў Кіеве 10 траўня еўрапейскія лідары ўзгаднілі з украінскім прэзідэнтам мірны план, згодна з якім Расея мае пагадзіцца на безумоўнае 30-дзённае спыненне агню з панядзелка, 12 траўня, і пасля замірэння пачнуцца перамовы. Сёння Уладзімір Зяленскі пацвердзіў: спачатку спыненне агню, і толькі потым можна размаўляць.
Уладзімір Пуцін жа падчас заявы ў Крамлі ў ноч на нядзелю прапанаваў адразу распачынаць перамовы – 15 траўня ў Стамбуле.
Палітычны аглядальнік Аляксандр Фрыдман у каментары «Белсату» раней казаў, што толькі ад Трампа залежыць, ці пагодзіцца Кіеў на беспасярэднія перамовы з Масквою без часовага замірэння: «Калі ад Трампа будзе такі сігнал – галоўнае, каб ішлі перамовы, – думаю, украінскі бок хутчэй пагодзіцца».
Аналітык пры гэтым сумняецца, што перамовы ў Турцыі будуць плённыя:
«Мне падаецца абсалютна фантастычным, што яны будуць паспяховымі. І тут мы ўбачым сітуацыю: у каго першага здадуць нервы, хто пачне відавочна зрываць перамоўны працэс, той урэшце і прайграе».
Пасля закліку Трампа Зяленскі заявіў, што асабіста прыедзе ў Турцыю на перамовы з Расеяй і будзе чакаць там Пуціна:
«Мы чакаем спынення агню з заўтра – поўнага і трывалага, каб даць неабходны грунт дыпламатыі. Няма сэнсу зацягваць забойствы. І буду чакаць Пуціна ў чацвер у Турцыі. Асабіста. Спадзяюся, што расейцы гэтым разам не будуць шукаць прычынаў, чаму яны не могуць», – напісаў прэзідэнт Украіны ў сваім Telegram-канале.
Сцяпан Кубік belsat.eu
