Прэзідэнт Украіны Уладзімір Зяленскі адказаў на заяву прэзідэнта Расеі Уладзіміра Пуціна аб тым, што Расея адмаўляецца ад спынення агню, але гатовая да наўпроставых перамоваў з Украінай у Стамбуле. Паводле Зяленскага, спачатку ўсё ж трэба спыніць агонь, вынікае з паведамлення ў ягоным тэлеграм-канале.
Уладзімір Зяленскі піша: гэта добры знак, што расейцы нарэшце задумаліся пра заканчэнне вайны.
«Усе ў свеце ўжо вельмі даўно гэтага чакалі. І самы першы крок у рэальным заканчэнні любой вайны – гэта спыненне агню.
,,Няма сэнсу працягваць забойствы нават на дзень. Чакаем, што Расея пацвердзіць спыненне агню – поўнае, доўгае і надзейнае, – пачынаючы з заўтрашняга дня, 12 траўня, і Украіна гатовая сустракацца», – адказаў Уладзімір Зяленскі.
Напярэдадні прэзідэнты Францыі, Украіны, а таксама прэм'еры Польшчы і Вялікай Брытаніі сустрэліся ў Кіеве і пастанавілі прапанаваць поўнае і безумоўнае спыненне агню на 30 дзён. Таксама яны патэлефанавалі прэзідэнту ЗША Доналду Трампу, які падтрымаў ініцыятыву.
Аднак Уладзімір Пуцін адмовіўся ад спынення агню, абвінаваціўшы Украіну ў тым, што яна заўсёды парушала падобныя дамовы. Замест гэтага Пуцін абвясціў, што Крэмль гатовы на наўпроставыя перамовы з прадстаўнікамі Украіны ў Стамбуле, якія нібыта могуць пачацца ўжо 15 траўня.
Аднак перамовы ў Турцыі былі і ў пачатку поўнамаштабнага ўварвання Расеі ва Украіну. А што датычыць захавання рэжыму цішыні на фронце, то толькі падчас велікоднага перамір’я 20 красавіка Расея атакавала Украіну ракетамі і дронамі амаль тры тысячы разоў, паведамляў Уладзімір Зяленскі. Прапанаваў тады ўстрымацца ад баявых дзеянняў менавіта Уладзімір Пуцін.
Арсен Рудэнка belsat.eu
