Дамова паміж Беларуссю і Расеяй аб гарантыях бяспекі, што дазваляе ствараць расейскія вайсковыя аб'екты ў Беларусі, была ратыфікаваная 26 лютага Палатай прадстаўнікоў Нацыянальнага сходу Беларусі.
Законапраект аб ратыфікацыі дамовы павінен яшчэ быць ухвалены Саветам Рэспублікі і падпісаны Аляксандрам Лукашэнкам. Дзярждума РФ і Савет Федэрацыі зацвердзілі дамову, падпісаную 6 снежня 2024 года, 18 лютага і 26 лютага адпаведна, перадае ТАСС.
Дакумент, у прыватнасці, прадугледжвае, што «з мэтай перадухілення і адбіцця актаў агрэсіі ў дачыненні Рэспублікі Беларусь на тэрыторыі Рэспублікі Беларусь могуць стварацца вайсковыя і іншыя абʼекты Расейскай Федэрацыі, а таксама размяшчацца вайсковыя фармаванні Расейскай Федэрацыі».
Апрача таго, бакі будуць разглядаць узброены напад на любы з іх як акт агрэсіі супраць Саюзнай дзяржавы ў цэлым і будуць рабіць адпаведныя захады ў адказ з выкарыстаннем усіх сілаў і сродкаў, якія маюць у сваім распараджэнні. На дадатак, бакі разглядаюць ядравую зброю РФ як тое, што «можа быць ужытае ў адказ на ўжыванне супраць любога з бакоў ядравай зброі або іншых відаў зброі масавага паражэння, а таксама ў выпадку агрэсіі супраць любога з бакоў з ужываннем звычайнай зброі, якая стварае крытычную пагрозу яго суверэнітэту або тэрытарыяльнай цэласці».
Пастанова аб ужыванні для «абароны Беларусі» размешчанай на яе тэрыторыі ядравай зброі Расейскай Федэрацыі прымаецца ў парадку, вызначаным бакамі.
Залежнасць Менску ад Масквы павялічваецца
Валер Карбалевіч, палітычны аглядальнік радыё «Свабода», у каментары «Белсату» адзначыў, што гэтая дамова мала што дадае да ўжо існай сістэмы ўзаемных абавязкаў у сферы бяспекі.
,,«Неабходнасць у ёй з'явілася, я думаю, таму, што былі ўнесеныя змены ў дактрыну бяспекі Расеі, дзе пашыраныя выпадкі, калі Расея можа выкарыстаць ядравую зброю. Там напісана, што калі на Беларусь будзе здзейснены напад, агрэсія, то Расея прыйдзе на дапамогу і можа выкарыстаць ядравую зброю. Гэтае палажэнне ўвайшло і ў гэтую дамову», – сказаў ён.
Вельмі небяспечным палітычны аглядальнік назваў тое, што расейскія войскі могуць быць пасланыя ў Беларусь у выпадку пагрозы «канстытуцыйнаму ладу». На ягоную думку, фактычна іх могуць увесці ў выпадку пратэстаў у краіне.
Агулам, мяркуе Валер Карбалевіч, дамова мае хутчэй «палітычны, піяраўскі, вайскова-стратэгічны сэнс» і дае Расеі магчымасць пагражаць суседзям Беларусі, «застрашваць іх». Але пры гэтым яна яшчэ мацней прывязвае Менск да Масквы, павялічвае залежнасць Беларусі.
Палітычны аглядальнік адзначыў, што нашая краіна ўпісваецца ў планы Расеі, скіраваныя на канфрантацыю, у тым ліку ваенную, з Захадам. «Беларусь робіцца закладнікам гэтых авантурыстычных планаў», – падкрэсліў ён.
Прэзідэнт Украіны Уладзімір Зяленскі мяркуе, што Уладзімір Пуцін плануе сфармаваць 12–15 дывізіяў і «адправіць іх усіх на навучанне, ваенную падрыхтоўку, ваенныя вучэнні ў Беларусь». На ягоную думку, пад выглядам вучэнняў будзе рыхтавацца плацдарм для наступальных дзеянняў. Але неабавязкова для нападу на Украіну, магчыма – на Літву ці Польшчу.
Міністэрства абароны Беларусі назвала дату правядзення супольных з Расеяй вучэнняў на тэрыторыі Беларусі – «Захад-2025». Вядома, што вучэнні пройдуць сёлета ў сярэдзіне верасня. І, мяркуючы з усяго, будуць вельмі маштабныя: удзел у іх возьмуць каля 13 тысячаў чалавек.
Аліна Скрабунова, Якуб Хруст belsat.eu
