Сітуацыя на беларуска-польскім памежным пераходзе трошкі палепшылася за некалькі дзён, але людзям усё роўна даводзіцца чакаць сваёй чаргі больш за тры дні.
На 16:00 панядзелка 9 чэрвеня сайт Дзяржаўнага памежнага камітэту паведамляе, што на мяжы ў чарзе пункту пропуску «Берасце» зарэгістраваныя 1550 легкавых аўтамабіляў. Агулам аўтам даводзіцца чакаць больш за трое содняў, часам даходзіць да чатырох.
Напрыклад, людзі, якія 9 чэрвеня нарэшце дачакаліся сваёй чэргі, чакалі гэтага амаль чатыры дні – з 5 чэрвеня:
«Наш выніковы час чакання – каля 86 гадзінаў. Шосты канал быў самы павольны, пасля перазменкі ўсіх на рэнтген даслалі», – паведамляюць людзі ў чатах мяжы.
Сама сістэма ацэньвае, што пры тэмпах, якія захоўваюцца, чаканне выкліку ў зону праходжання кантролю адбудзецца праз тры дні. Такім чынам, калі стаць у чаргу ўвечары 9 чэрвеня, выклікаюць вас прыкладна 13 чэрвеня.
У адваротны бок, з Польшчы ў Беларусь, чэргі аўтаў знікаюць хутчэй:
«Стаў у чаргу да палякаў на заезд а 8:47, да шлагбаума была чарга 1,2 км. Заехаў да палякаў а 13:20. Заехаў на мост а 15:10. Заехаў да беларусаў а 15:55. Выехаў ад беларусаў а 17:35. Машыну і рэчы на рэнтген не адправілі, а вось побач украінцаў цалкам прасканавалі і «запаску» выняць папрасілі», – піша ў чаце іншы чалавек.
З аўтобусамі гісторыя такая: на мяжы стаяць 27 аўтобусаў. А некаторым падарожнікам пашанцавала: адзін з пасажыраў піша, што пасля перасадкі ў першы аўтобус паездка з Менску да Варшавы заняла 15 гадзінаў. Ва ўмовах нядаўняга калапсу – зусім някепскі вынік. Акрамя таго, людзі пацвердзілі, што перасесці ў бліжэйшы да шлагбаума аўтобус «Менсктрансу» і «Intercars'у» можна бясплатна – то бок новыя правілы працуюць.
«Ехалі ў Польшчу з Беларусі праз «Менсктранс». З Менску выехалі а 6:30, на мяжы былі а 12:30, 18-ыя ў чарзе. Пераселі бясплатна ў другі аўтобус у чарзе, таксама «Менсктранс». Бяруць і збоку за 150 рублёў да Варшавы. Аўтобус стаіць з 6:00 на мяжы. Сярэдняя хуткасць – тры аўтобусы за гадзіну», – пішуць у чатах сведкі.
З польскага боку ў Тэрэспалі вялікіх чэргаў не назіраецца, піша Польская памежная ахова. Час чакання для легкавікоў – 2 гадзіны, для аўтобусаў яго ўвогуле няма.
На памежным пераходзе паміж Беларуссю і Літвою «Каменны Лог – Мядзінінкай» сітуацыя падобная: у кірунку Літвы чаргі ўвогуле пакуль няма.
Нагадаем: 5 чэрвеня Памежны камітэт Беларусі паведаміў, што польскі бок перастаў прымаць аўтобусы. Пазней у Памежнай ахове Польшчы запэўнілі, што не спынялі пропуску транспарту на памежным пераходзе ў Тэрэспалі, аднак адзначылі, што хуткасць афармлення наўпрост залежыць ад нерэгулярных мігрантаў.
Пры гэтым афіцыйны прадстаўнік Надбужанскага аддзелу Памежнай аховы Польшчы Дар'юш Сеніцкі адзначыў, што з увагі на нерэгулярных мігрантаў даводзіцца скіроўваць службоўцаў на гэтак званую зялёную мяжу, дзе парушальнікі намагаюцца трапіць на тэрыторыю Польшчы.
Але трошку прасцейшы кўэст з пераходам мяжы стаўся пасля таго, як пасажырам «Менсктрансу» і «Intercars’у» дазволілі бясплатна перасаджвацца. Працуе гэта так: калі пад мяжой аўтобус чакае ў чарзе, а ў іншым аўтобусе той жа кампаніі, што стаіць бліжэй да мяжы, ёсць месца, то можна бясплатна перасесці
Тэса Анэйда belsat.eu
