Супольнасць чыгуначнікаў Беларусі паведамляе, што ў краіне фармуюцца воінскія эшалоны і перавоз імі войска можа мець даволі вялікі маштаб.
18 лютага на станцыі «Багатырова» каля Менску пачаўся адбор пасажырскіх вагонаў паводле замовы Міністэрства абароны. Вядома, што ўжо падрыхтавалі 48 вагонаў. Адначасова былі пададзеныя заявы ў «Белінтэртранс» на вылучэнне грузавых вагонаў для перавозу вайсковай тэхнікі, боепрыпасаў і абсталявання вайсковага прызначэння.
Пасажырскія вагоны адбіраюць такія, «якіх не шкада», пераважна плацкартныя. Іх скіруюць на станцыі каля буйных вайсковых частак і аб’ектаў стратэгічнага прызначэння, дзе будуць фармавацца воінскія эшалоны.
Супольнасць чыгуначнікаў мяркуе, што могуць быць сфармаваныя прыблізна 16 эшалонаў.
,,«Для Узброеных сілаў Беларусі гэта даволі значнае мерапрыемства паводле імаверных аб’ёмаў воінскіх перавозак, – зазначаюць «чыгуначнікі». – Па стане на 25 лютага большая частка з запланаваных 48 адзінак вагонаў пасажырскага парку ўжо адпраўленая на станцыі прызначэння. <…> Адзначым, што ўказаная колькасць вагонаў для воінскага кантынгенту, што былі перасланыя, а таксама тых, што плануецца пераслаць, не канчатковая».
3 лютага Міністэрства абароны Беларусі абвесціла пра пачатак праверкі боегатоўнасці арміі. У войска пачалі выклікаць ваеннаабавязаных. Людзей заклікалі ў тым ліку з запасу. Вайсковаабавязаныя павінны «выканаць увесь комплекс мерапрыемстваў для падрыхтоўкі ўзбраення, вайсковай і спецыяльнай тэхнікі да ўжывання, выйсці ў прызначаныя раёны».
«У межах праверкі пройдзе апрабацыя новых спосабаў прымянення разведвальных і ўдарных беспілотных авіяцыйных комплексаў пры супольным выкананні задач з сухапутнымі войскамі і актыўным выкарыстаннем сродкаў радыёэлектроннай барацьбы», – паведамляла Міністэрства абароны.
Марыя Міхалевіч belsat.eu
