Нацыянальны банк вызначыў курсы валютаў на заўтра: за долар будуць даваць 2,9953 рубля. З пачатку года амерыканская валюта патаннела ў Беларусі на 13,8 %.
У выніку першых на гэтым тыдні гандляванняў на Беларускай валютна-фондавай біржы долар патаннеў на 0,06 %, да 2,9953 рубля, еўра падаражэла на 0,32 %, да 3,4332 рубля.
На 0,14 % вырас курс 100 расейскіх рублёў – да 3,7845 беларускага. Кітайская валюта патаннела на 0,02 %, да 4,1653 рубля за 10 юаняў.
Курсы Нацбанку на заўтра такія:
- долар – 2,9953 рубля;
- еўра – 3,422 рубля;
- 100 расейскіх рублёў – 3,7845 рубля;
- 10 кітайскіх юаняў – 4,1653 рубля.
З пачатку года курс долара ў Беларусі знізіўся на 13,8 %. На 14,1 % патаннеў юань. А вось у дачыненні расейскага рубля наш рубель абясцэніўся на 13 %.
Гэтыя тры валюты залучаныя ва ўмоўны кошык, паводле кошту якога эканамісты вызначаюць, як пачуваецца беларускі рубель. Калі беларусаў збольшага цікавіць толькі долар, у якім прызвычаіліся захоўваць ашчаджэнні, то адмыслоўцы прыглядаюцца да ўсіх трох валютаў.
Нягледзячы на істотнае падзенне долара і юаня, беларускі рубель з пачатку года дэвальваваўся да кошыка на 1,4 %. Гэта тлумачыцца тым, што 60 % у кошыку займае расейскі рубель, які паступова ўмацоўваецца.
Еўра, якога ў кошыку валютаў няма, патаннеў у Беларусі сёлета на 5,6 %.
Сцяпан Кубік belsat.eu
